［拜年話題］ 踢爆嚟多次沙士買樓（或買股）嘅虛妄（已FC）
（圖可以入meidum 睇）
1. 即入正題，一句收你皮，或者你收我皮（即係唔同意唔使再睇）。都係一句。2003年，香港股樓根本冇因為沙士大跌過，講完。前者肯定係，後者其實都係係地。
________________________________________
2. 拜年妙品，初三更佳，你拜年講呢啲保證摟屌，惹火過講政治。但應該可以令你成為表妹（或表姐，甚至表嫂）眼中「呢位小朋友有啲意思」嘅人。我？我梗係唔係，我拜年碌電話唔講嘢的。講嘢就開拖架啦。
3. 其實內容同之前Primeness Post （已出咗新一期，搵唔返舊文，搵到再貼）出過嘅差不多，不過嗰篇主要講樓，呢篇講埋股票同，哈，你地最鍾意（但其實冇用）嘅，實體經濟。
________________________________________
4. 反修例風波，做咗N日頭條，破咗（應係？）陳冠希紀錄後，卒之在新年間（又係新年！仲咁啱都係鼠年！）畀另一單新聞搶咗。當然就係肺炎。香港人當然好著緊，除咗係因為反中外，亦因為真係香港人集體回憶。唔鍾意呢個詞，但都要用，的確係，我都唔例外。
5. 打後十幾年，總會有人講，最好嚟多次沙士，咁佢就可以買樓。近半年少咗啲人講（因為而家講錢太庸俗），但早幾年真係好多。
6. 講嘅，有啲固然係半講笑，但亦都有唔少人真心想嚟多次沙士。拿，而家恨到啦，個個好似四仔咩禁欲幾多日待爆啦可？。但我相信，講嗰啲唔係黑心想有人死，而係想樓價大幅回落有機會上到車。事後睇（當然易），2003年真係上車良機，打後十幾年，香港樓年年都升，得一年跌 — 就係金融海嘯嗰年。2008年跌咗15%，冇啦
7. 又係事後睇返，咁2008年真係世紀第二次（有第二次仲係世紀？）買樓良機。打後十年更加係升到絶塵。甚至舊年（2019）香港經濟又衰退大陸經濟又放慢又貿易戰又社會事件，都冇得跌。
8. 本人唔做道德撚，亦唔做醫學撚（其實有學者話沙士根本誇大，只係普通嘢）。想嚟多次沙士係咪不道德，定係高樓價更不道德，不在討論之列。我只講客觀（盡量）分析。想講嘅係：有冇諗過「沙士令到樓價跌」，本身就唔係事實？所以「嚟多次沙士樓價就會跌就會買到樓」（留意，跌咗都未必代表你買到，跌八成都未必代表你上到會），根本就係建基於一個虛假嘅前設。當然啦，前設假結論都可以啱，另計。
9. 沙士樓市有幾慘，唔使我多講，就算未出世嘅都知，媒體同我等廢老樂於成日回帶。淘大嘛，經典。但你睇真啲，當年跌得（算）快，彈得仲快！你睇呢個樓價（中原領先指數，下同），根本全年仲有得升！問你死未。
10. 睇下按月，3月叫做爆發沙士，大家開始當係大件事，35.7 跌到33.6，6%，好急架啦。如果你睇差餉物業估價署，冇咁多添。
11. 然後？去到6月世衞除名，樓市7月尾經見底。即係由3月跌到又係5%左右。調整係幾急，但反彈更加急。兩個月後樓價已經反彈到沙士之前，年尾已經升穿埋年頭嘅位。死未？你覺得你可以短短幾個月間下定決心又班到水又上到會買到樓？事後講就易。我知，你總有個朋友有咁做，我都有朋友咁做。但我自己冇，你都冇。你覺得下次你可以？
12. 仲有，更重要嘅係，「沙士推跌樓價」呢個講法，我本人係相當懷疑。唔會話冇影響，10%喎，但，真係完全因為沙士？時間上係吻合，亦都冇得好似科學實驗咁做control（所以金融咁難估，因為涉及人）。但我質疑嘅理據係乜？好簡單，根本97年後，香港樓就冇好過，跌足5年。98年跌36%，加上嗰時息高，啲人做槓杆又狼，呢啲就真係輸到跳樓。00年一樣跌18%，沙士之前一年嘅02又跌12%。可能係97前炒得太癲，可能係八萬五，可能係亞洲金融風暴後遺症。不重要，總之，肯定沙士之前N年樓市已跌緊，仲跌得好甘
13. 2003年根本未有沙士亦都跌緊，所以之後幾個月，真係完全因為沙士跌？定只係最後一根稻草踩多腳？諷刺係，沙士之後就即時反彈。
14. 我計你沙士，高位跌低位，樓價都不過係10%—10%唔算少，但，係咪世紀良機？咪講過咯，98,00,02都唔止呢個數。08年亦都多過呢個數。甚至19年有啲單位都唔止呢個數—你有冇見有人講？根本08同19就已經勁過沙士重臨，但講「嚟多次沙士買樓」嘅，當時飛咗入去未？定都係睇定啲？今次唔同？跌多啲先？所以係冇用的，嚟多次你都唔會買，或者買唔到。因為沙士根本跌得冇你想像中咁多。正如話等騰訊跌到300先買嘅，真係300蚊你估佢又會買咩，又話等200蚊啦。唔係笑人，而係呢啲心態係人嘅平性，你要面對佢。避雷針嘅比喻：有咗避雷針後行雷閃電冇少咗，但我地冇以前咁驚。
15 順手講埋，你最鍾意（但冇用）嘅，實體經濟：比個震驚嘅真相你：
16. 沙士嗰年，香港經濟根本冇衰退！
17. 冇呃你，自己睇。係違反你常識，但幾時話你啲常識可靠？自己睇圖丫，或者上返任何地方睇數字，2003年香港GDP係正增長，之後嗰年都係，其實打後咁多年就只有2008年跌，呀仲有，2019年都應該跌。
18. 咁你話，你玩數字遊戲啫，全年梗係冇事，但有單季倒退嘛。係喎，Quarterly 你都識喎，有讀書呀呀。就睇埋Quarterly
19. 拿，見到啦，2003單季係倒退過，一季咁大把，仲要一個巴仙唔夠。唔好話同98，08嗰啲慘況比，根本01，02 就仲大鑊（亦所以樓市一早跌）。沙士後更加係話咁快反彈。
20. 唔講咁遠，講近啲。舊年第四季香港經濟一樣大倒退，一早慘過沙士啦，使乜沙士重臨？
21. 但，舊年第四季，港股跌幾多？你可以去睇下，唔阻你做功課。
22. 所以話你知，股票同樓，金融市場，根本唔係好多人想像咁運作。我方死你唔夠傷心，睇埋03年嘅股市丫？
23. 自己計下，升咗幾多。當年恒指同國企指數，全年係升到七彩嘅。唔係咩勁升一千點（有時真係頂而家啲記者或作者唔順，五百點就股災，兩千點就血洗，你都未撚見過血呀），而係講緊全年升35%！而家水平計，即係升10000點！你話發癲？你見識少啫
24. 我都未同你計，35%講緊全年咋喎。低位一定唔止。你低位買嘅，升50%添呀
25. 當然你話，喂，你事後畫龍門梗係屈機啦，你不如話十蚊買騰訊丫。啱。睇埋downside，又係一個挑戰你常識嘅事實
沙士嗰年，恒指根本冇乜點跌過！！！
26. 有圖為證，自己睇。所謂沙士期間港股大跌，講緊7%唔夠。而家水平，講緊1800點多啲，以為好多？咁話你知，呢個星期四日半（年三十半日市）已經跌咗1100點，未去到沙士，都大半。
27. 係喎，都未同你講，失業率。是的，沙士嗰時升到8%樓上。但一樣，你可以睇下之前幾年發生咩事，02年正係唐英年發表著名嘅「有生之年」講話，當時失業率已經升。反而係沙士時見底
28. 結論：沙士之前幾年，樓市已經狂瀉。沙士就算伸多腳，跌幅亦唔係特別大，而且調得急又彈得快，要捉到都極難。至少沙士呢啲樓價跌幅，沙士前已經成日有，沙士後亦都有過唔止一次。捉唔捉到，敢唔敢捉，有冇能力捉，應唔應該捉，四回事。
29. 仲有，涼薄（其實一有人用呢個字我就當佢理屈詞窮）啲講，大佬呀，我中華十三萬萬同胞呀，沙士？幾百人？幾千人？幾萬人？撈迫刁啦。你估真係對實體經濟好大影響？
30. 我就當對實體經濟好大影響，邊位話你知股市係跟實體經濟行？仲堅持係嘅。咪睇下17年，18年，19年嘅香港股市（環球都好）。仲堅持係嘅，咁你應該認為過去十年買A股表現一定好過美股。實體經濟喎。
________________________________________
31. 麻煩嘢放最尾，費事阻讀者雅興，但唔講又會有啲盲毛唔明。講明先，唔好又話我盲目唱好呀，粉飾太平呀乜。之後走勢？唔知。疫情？應該再擴大。但係咪股樓會再跌？我估未必，但應該唔會，但錯咗唔好鬧，反正冇人拎支槍迫你買或賣。
32. 況且，歷史唔會簡單咁重覆。唔同意分析嘅大可以講：喂，上次點點點，後來有點點點（自由行，些爬，阿爺，任你填），而今次又有乜乜乜（貿易戰，社運，中國債務危機，亦都任你填）喎。事實係咁，所以無任何兩件事有可比性，先賢話齋，你不能跨過同一條河兩次。
33. 但，個盲點係，其實講以上呢堆嘢嘅人，講自己立場時，話會大跌，咪又係用返當年嘅歷史。所以就同你講歷史，因為歷史相對（相對咋下）地客觀，發生咗嘅事，冇咁多嘢可以拗。跌幾多就係幾多。當然要拗「點解」就會主觀啲。正如聽日報紙報恒指升幾多點係客觀，但因為乜乜就唔係完全客觀，個市唔會話你知點解升點解跌。
34. 但最後都補多句，其實唱好根本唔係盲目，Optimism is a Default Setting．唱淡嗰啲先係盲目，亦都多數死清光。兩樣嘢，首先，我係悲觀嘅樂觀者，我相信人類都係咁嘅，悲觀嘅基因慢就死晒，唔樂觀嘅燒炭啦，對不？第二，正經啲。買股票又好，買樓又好，講緊係十年八年甚至幾十年嘅事（呀，你以為我教你炒即日鮮？）。一兩年會點難估，但幾十年易答啲，股票同樓嘅嘢，長期都應該係升嘅。
35. 理由？環球央行一路行寬鬆，群眾小小痛都受唔到。你可以問下自己，十年後，廿年後，三十年後，錢（任你點定義貨幣供應），會係多咗，定少咗？咁答到呢個問題，大約都估到，資產格價會點行啦可？咁當然必你嗰層樓實升，未必港股實識。但must be bull market somewhere．一早叫你分散投資亞洲美洲歐洲債券股票樓都買啲啦。
36. Cutie little fucking little thing called inflation，你唔係信政府啲3%通脹下話？你問下計嗰條友食過魚柳包未？買過太古城未？去過東莞未？（聽朋友講有魚聊包買，我都唔知，我以為東莞米粉出名）
little cutie意思 在 瑪蒂達美語- 今天的每日一句分享介紹的是- Cutie-pie 親愛的 的推薦與評價
Where are you, my little cutie-pie? 你在那，我的小乖乖? cute-可愛，加上ie, cutie就變成口語裏小可愛的意思，而pie-派，則是人人愛吃的美味甜點， ... ... <看更多>