【盛夏友晴天 算係近年迪士尼最差嘅卡通電影？！】
……🚨含少量劇透……..
我係迪士尼個page見到以下呢啲comment：
1.【剛睇完，都算好睇，劇情一般下，覺得編寫的跟島上孩子完全無溝通，只根女角有直線聯係，只是三個人同魚的相遇，比賽又無刺激感。】
2.(票房冠軍) 【只因呢排無其他戲睇… 其實主線好雜亂】
3.【睇左 算係近年迪士尼最差既卡通電影 水準大幅下降
比之前彼思動畫,喱部差少少】
4.【小朋友睇會覺得唔錯。嬉嬉哈哈 講下友情。重色輕友。
非常非常平庸。沒出色之處。 跟inside out 和 coco 差了幾十個馬位。】
樂壇點解會『已死』？
就係因為香港人好鍾意用以前嘅好做比較
八九十年代啲歌好聽…所以而家啲歌就唔好聽
《Inside out / coco 》太出色…所以新嘅就唔好睇
點解一定要咁比較？佢又唔係續作…又冇關連
如果拍返《inside out 2》你又會話炒冷飯
所以PIXAR好明題係想玩一啲完全唔同 新鮮嘅主題
之前幾套都好複雜 好meaningful
今次就玩小品簡單 我自己就覺得好清新
年頭已經有一套《soul 》
年中再嚟多套 我就會覺得佢將成功方程式不停重複
新海誠《天氣之子》 又係好複雜好多野講
反而咁簡單嘅卡通真係好耐冇睇
雖然Mirror同Error都係ViuTV出品
但你唔可以咁樣比較 因為路線唔同
《Inside out》 同《Luca》亦一樣
我唔明點解主角要跟島上孩子溝通？？
島上居民得幾個作用
1.擾亂父母 2.畀父母攪攪陣 3.最後跳起yeah同BBQ
人類根本就係得嗰死飛仔 爸爸 同 茱莉亞 有作用
其他根本係茄喱啡
比賽唔刺激咩？比賽刺激唔係在於比賽本身
係在於路卡點樣完成比賽之餘 又唔好畀人發現佢係海獸
落雨唔刺激咩？好刺激喎！
我本身係以為有人潑佢水咋 點知玩到落大雨咁激
之後嗰幕英雄救美仲好浪漫添
有人又話悶 有人又話主線太亂？？？
套戲就係太簡單 所以先會有人覺得悶
主線亂？
主線就係得兩個主角想贏比賽
而茱莉亞只想贏返次比賽 所以一齊組隊
另一邊路卡父母想搵返個仔
～完～
個故事仲簡單過《Finding Nemo》
邊到亂？(黑人問號)
Warrior 一定好聽過BOSS
歌詞又有意思 我一定鍾意Warrior多啲
但我第一次聽到BOSS嘅時候
係覺得開心 因為曲風好新鮮 有別於Mirror之前所有歌
而隻舞都係 成個感覺好好玩好輕鬆
歌同戲都係一樣
聽得多 睇得多 都想轉變創作風格
作為觀眾聽眾 唔好一嚟就話差過之前好多 今次唔得 乜乜乜
Luca 係近年迪士尼最差嘅電影？？？？
我又唔覺
咁1/2的魔法/魔海奇緣呢？
其實我覺得《Luca》仲好睇過《Toy Story 4》
呢套戲簡單到冇乜金句
有都可能係『你喺到搞咩呀？你個蠢材！』(誤)
戲入面想講嘅 主角們 已經用行動做咗出嚟
好鍾意903 DJ阿檸寫嘅呢句「希望大家捉緊自己個艾伯圖」
有一個好似艾伯圖咁嘅朋友真係好難得
處處為你著想 佢嘅世界你係佢嘅唯一
如果你有 就要好好珍惜
p.s.我唔排除真係有人覺得唔好睇 同前作無關
但好多人都係睇完人comment先決定睇唔睇
如果見到樓上個啲comment 真係唔會敢去睇！
——————————————
#盛夏友晴天 #Luca #迪士尼 #彼思動畫 #pixar #disney #海獸 #友情 #冒險 #偉士牌 #Alberto #路卡 #艾伯圖 #電影 #卡通 #影評 #平反
