［壯下膽］Compound Capital Advisors CEO 兼創辦人 Charlie Bilello 整的圖
標普指數過去8日已跌10% (拿，都話專業投資者唔會講道指）。
某啲人嘅定義下，10%已經算係一個大調整，而20%就算係熊市（我係唔多用呢啲指標的）
如果講10%嘅，2018年都有兩次，年頭一次，年尾一次。
年尾嗰次更加係跌兩成多啲，你大可以去話咩熊市重臨—但打後2019年好到不得了（亦因為咁我唔會執著於係咪20%）
再睇遠少少，2009年（＊）到而家，十年多啲嘅升市，入面都8次10%以上嘅調整（未計今次）（仲有次9.8%，唔同你計）。你話清倉呀止蝕呀，就錯過晒了
另外，當中跌20%嘅都有兩次。唔通又計熊市？
又，成個表，其實係畀你睇到全部5%或以上嘅pull back，即使係差不多全球最強嘅美股，呢個十年升市，都有N咁多次。所以一係你夠大膽坐得穩，一係你掟埋一邊唔好睇電視，一係咪分段月供買咯。
對我嚟講，只有2008年嗰次先真係叫股災大件事。2010前後歐債危機都算半次。
有乜共通點？都係金融系統出問題。
經濟衰退唔會死人，天災人禍都好少死人，資產價急跌都唔會死人—但過度槓杆就會。差不多所有真係打得死股市嘅危機，都係因為債。你睇亞洲都係。除咗金融海嘯，就係亞洲金融風暴，亦係金融系統出問題，加埋債務。
所以而家我都並唔係十分擔心嘅。call me 維園阿伯，但選舉年，侵侵原本形勢大好，1賠1.5，點會畀呢啲嘢搞到佢有變數？再有乜問題佢咩招都會出，迫聯儲局減息又好減關稅（！）又好直接買股票又好，總之乜都會出。
（＊）哈，換著我寫又畀人串做乜特登唔計2008年啦。但點解人地用呢個位？因為就係低位開始打後嘅十年牛市。
