【舊酒新瓶嘅求職陷阱】
條片已經係2012年嘅事，但呢啲蠱惑嘢喺2017年仲好似舊酒新瓶咁重現，因為辦公室日報最近收到好多網友嘅 message，話喺求職網站搵工，明明係搵Admin、搵Sales & Marketing、甚至搵Accountant，但上到去見工先知道係叫你轉行賣保險。
聶瞳細細個搵暑期工嗰陣，都試過明明apply CS，上到去先知原來係保險公司，然後條友就會懶係苦口婆心咁同你講解，目的都係得一個，就係做咩 CS 吖，梗係做保險先賺到錢啦，潛台詞即係「我哋根本冇 CS 呢個職位，呃你上嚟想叫你加入保險經紀行列咋。」其實做保險唔一定係壞人，好多保險從業員係有良心有知識有Service，但係你靠呃呃氹氹叫人做，成件事就係掛羊頭賣狗肉。
可能時移世易，近年以保險公司身份出招聘廣告，已經冇乜人send cv去apply，所以保險界都鍾意搵獵頭公司請人，而作為同行，我真係好想講一句，獵頭呢行就係俾呢班人渣搞臭晒個名，我明白唔係所有Consultant都有能力去選擇客人，有啲Consultant手上嘅係好工，有啲手上嘅係爛工，但唔緊要，作為Consultant收到個 job 要幫保險公司搵人，就堂堂正正企出嚟做，日日都有人去保險公司返工，代表有啲人真係有興趣做，咁咪搵呢啲求職者囉，明買明賣啫，但係出隻稿請Admin、Manager、Marketing Assistant、Accountant或者Clerk，最後啲求職者帶齊學歷同工作證明文件嚟interview，有啲仲係特登請假，但去到先知係叫佢轉做保險，究竟有冇諗過求職者嘅感受呀?
獵頭呢行係幫公司搵人， 同埋協助人搵工， 而唔係呃人返工，冇料到就轉行，唔好搞臭呢行個名，有好多Consultant係好熱血架，唔好令到獵頭呢行蒙羞！
對於求職者，我想用point form講幾個重點，希望幫大家避免遇到呢類求職陷阱:
1) 搵工要搵有公司名嘅job，雖然有公司名都未必安全，但冇公司名就99%係伏，請人都鬼鬼鼠鼠偷蕃薯，就唔好請人啦，有啲登埋email係@gmail.com、@yahoo.com、@netvigator.com呢類，盡量唔好send cv去。
2) 獵頭公司喺電話約你上嚟見工嗰陣，唔同你講個客嘅公司名係好正常，因為有啲公司可能想炒人，所以要搵獵頭公司秘密招聘，又或者有啲無良行家會扮求職者套料，目的係要偷對手個客，想知道係邊個客搵緊人，呢點大家要諒解，不過======就算間公司名唔可以透露，個職位同埋性質都唔需要隱瞞，作為求職者，收到獵頭公司打嚟，可以直接問對方呢間係咪保險、倫敦金、傳銷，又或者涉及要投資嘅公司。
3) 唔排除保險或投資公司真係要搵人做內部文職，例如Receptionist、Accountant、Designer、IT...等等，可以劈頭問對方係咪唔會上到嚟之後，就叫自己轉行賣保險，表明係想轉工，唔係想轉行，轉工同轉行係兩回事。
4) Consultant好定唔好，關鍵唔係佢任職嘅公司係大名氣定係冇名氣，大嘅獵頭公司都一樣有衰嘅Consultant，樹大有枯枝，而細公司亦會有好熱血嘅Consultant，就算喺分租office同你做interview，亦唔等於佢呃人，所以唔係睇公司，係睇Consultant嘅人格。
5) Sent咗cv幾個月後，甚至幾年後都有人搵你，其實係合理嘅，因為每間公司都有自己嘅Database，所以唔出奇，但唔會之前sent去A公司，之後就變咗B公司搵你。
6) 可以上去見工前，喺google search下個見工地址，講緊嘅係完整地址，例如旺角大廈12樓A室，如果有人曾經中伏，多少都會喺網上談論過。
7) 如果都係中伏，記得post上嚟講，等我幫你炒大佢，同時等其他求職者唔好中招。
IG有網友inbox嘅內容，想睇請移玉步
IG: officedailyhk
http://hk.apple.nextmedia.com/news/art/20120918/18018818
receptionist招聘 在 招聘接待員Receptionist (月薪:... - RecruitFirst Hong Kong 的推薦與評價
招聘 接待員Receptionist (月薪: $14000-$15000) - 工作地點: 觀塘- 9 am - 6 pm; 星期一至五- 流暢英文及普通話- 最少兩年相關工作經驗- 高級文憑或以上有意者請寄 ... ... <看更多>