Project -Say Your Dream- 十一月號
《關於夢想》
幾個月前接到久保兄邀請，要寫一篇關於「夢想」，口輕輕應承左，結果發現非常難下筆。
難下筆係因為呢個題目太多嘢可以寫，但一over咗就會變成精神仔雞湯，或者一篇自吹自擂嘅說教文章⋯ 都知讀者時間寶貴，呢啲就唔好搞大家。
有幾晚坐喺屋企個露台度諗住認真寫下文，點知「夢想」呢個topic令腦海浮現太多畫面，又回味下往事，又憧憬下未來咁⋯ 跟手點埋個蠟燭，斟返杯威士忌，再播首Tuesday Heartbreak，結果一隻字都冇寫，又一個Holy Lonely Night⋯
講開飲酒，近排實現左一個小夢想，開左間威士忌吧。間嘢名副其實係來自「夢」 - 記得十幾年前木村有套戲叫「冰之驕子」，入面成日有個場景係班冰曲球員打完波會去一間上下兩層嘅酒吧吹水。嗰時睇咗幾集，唔知點解連續發左幾日夢，夢見自己會own一間類似咁嘅酒吧⋯ 結果，機緣巧合之下，上年就真係開咗，仲要exactly係上下兩層。
講到好似好輕鬆咁，其實我相信每一個夢想背後都一定有好大嘅付出。利申先，我嘅職業唔係「做兒子」，開舖都係自己嘅血汗錢。其次，我本身唔係餐飲呢範，但份人又衰完美主義：為咗作品能夠100%呈現心入面嘅畫面，由搵盤、傾租、設計、裝修、出牌、入貨、請人、menu⋯ 到開舖、搞grand O都堅持要自己跟。我哋呢啲本身要着老西返工嘅，每日放工趕落site，對擦令咗嘅皮鞋即時化灰。好在間野出嚟都叫見得下人，飲得杯落，cheers！
「夢想」本身可能純粹只係一個感覺、一個偶然，但要將「夢想」實現，背後就需要有極大嘅執行力同意志去盛載。
我習慣每晚除左寫日記之外，仲會計吓自己活左幾多日 － 假設有82歲命，一生大概有三萬日⋯ 減埋通常都係痴痴呆呆嘅頭尾十年，你可以喺人生之中留低啲痕跡嘅時光就大概只有兩萬日。兩萬其實係一個好細嘅數字，所以我成日同自己講：如果人生係一個旅程，一定要不枉此行。
年青嗰時打boxing，夢想係職業拳擊。自問學嘢天份唔係好好，所以特別比心機練習，加上叫做幾捱得，出去打得都唔錯⋯ 可惜之後因為頸椎受傷被迫放棄，跟住返咗大學讀碩士又幫手教下書，果段時間都幾depress。後來俾個前輩捉咗入金融業，機緣巧合下去咗buy side做intern。當時𡃁仔一名，淨係知道buy side嘅頂點係基金經理，俗稱「芬佬」，聽落好似幾型，又幾受人尊重，覺得佢地喺行業嘅地位應該等於拳擊嘅職業拳手 － 呢個概念一直放左喺心入面。
可能香港呢個城市太現實，好多叻人都仆住做finance。呢個industry，由美貌到智慧，實力到手段，學歷到父蔭，最top嘅人大部份都喺入面。所以由入行開始，我覺得自己每一刻都好劣勢，要比別人加倍努力先至會有少少機會突圍 - 同打拳一樣，自問唔係天份型，要贏，基本功同體能都要比人哋紮實，仲要比人哋更加捱得 - 記得好幾年前為咗一個事業上突破嘅機會，自己喺不收分文嘅情況下用咗半年時間幫人揼份proposal，放工放假時間全奉獻。無數個無眠嘅夜晚，理解一大堆從來未見過嘅概念，甚至自掏荷包搵外援幫手build model，為的只係要將事情做到最好。結果雖然係失敗咗，不過卻因為咁得到咗寶貴嘅「刻意練習」機會，加上當時過五關斬六將其實已經去到final stage，覺得力已盡，no regret。Fast Forward，之後都經歷咗唔少高高低低，每次跌倒咗又企返起身，抱住「唔怕蝕底，一蝕就蝕到底」嘅心態衝啊衝，不斷學習，差啲仲做埋「蝕底界」恐怖分子嘅代言人（講笑⋯ 不過望返轉頭自己當時真係好搏命），就係咁，喺不知不覺間爭取咗好多好多機會成長－
最終，「換血勾拳流」的進取型打法得到了對手的尊重同認可，亦讓我真正進入了投資世界的職業擂台！
記得以基金經理身份上班的第一天，我在清晨已經返到公司。拿着鎖匙打開房門，望住喺晨光初現下閃閃發亮嘅維港，我心裡在想：上天關掉你一道門，總會給你打開一扇窗這句說話原來係真嘅！
希望你也找到上天已經為你打開了的那扇窗。
Shawn簡介
由運動員到基金經理，自稱是一個非典型的80後。
因傷放棄職業拳擊的夢想，誤打誤撞進入了金融界。從無名小子，一步一步地打進了投資世界的職業擂台。
最近瘋狂地迷上了調酒，經常在他自己的店客串，同時被BACARDÍ選為香港TOP20 Bar tender － 有機會一定要到Monte Carlo Whisky Club試試他親手調的Old Fashion。Monte Carlo Whisky Club
#sayyourdream #fulltimeheadhunter
sayyourdream 在 GLAY / SAY YOUR DREAM - YouTube 的推薦與評價
GLAY 40th Single「SAY YOUR DREAM」から『SAY YOUR DREAM』のミュージックビデオを公開！ ... <看更多>