《隨心》
前排同兩個仔去戲院睇《靈魂奇遇記》。真係冇諗過，可以喺一套卡通片裡面觸發到我對人生嘅反思。同一般嘅迪士尼片好唔同，呢套戲走嘅並唔係童話路線，而係一開始就講個主角要死。
人間、陰間，原來仲有一個中間：係一個混沌嘅世界，入面有好多仍然生存嘅人，但佢哋迷失左方向。佢哋喺追夢嘅過程之中，忽略咗生活嘅每一個細節，勞勞役役，卻發現最終唔知為乜。
戲入邊有一句說話，令我記到依家：「夢想並唔係你嘅火花！」人們追求活得燦爛，尋找可以燃亮生命嘅一點火花。但係原來火花唔一定係好偉大嘅成就，而係簡單到懂得欣賞花開、花落。
我常追夢：要去領軍，要去操肌；要開四面台，要學寫馬經。但其實呢一切嘅背後，我，到底活喺人間抑或係混沌之間？兩個小時嘅卡通，竟讓一個時刻衝鋒嘅人得著一個退一步嘅機會。
呢個星期，我聽左好多樹莉莉（Serrini）嘅歌。成功並沒有一個標準，人活著最緊要係開心。咁點先可以開心？咪就係隨心所欲，做返自己囉。睇住一個開心嘅人，自己都會開心，所以條女咁紅。
🙃
#靈魂奇遇記 #夢想與火花
#隨心最要緊 #樹莉莉好正
