一，過兩日又係財政預算案。每年財政預算案，傳媒同 #政工作者， 都好鍾意講 #派糖。我就好唔鍾意呢種奴性咁強嘅語境；使唔使好感激流涕，誠惶誠恐吖？
二，如果冇記錯，派糖 呢個詞語出自 #唐英年。
三，另外，每年輿論又好鍾意講 N 無；數學常識話我哋知，永遠都有 N+1 ，即係話 N 等於乜真係冇意思。
四，好多人自己以為自己好有獨立思考乜乜物物，但實情係佢哋一直有意無意咁，幫緊個政權 set agenda ：「政府有責任照顧人民。」
五，呢個 agenda 有乜問題？問題，有兩個：
五（一），因為權責必須相稱，當你呢頭話政府有責任，個頭其實意味政府有更多嘅權力。我唔係主張 #無政府主義，但社會總要劃條界線。N 無呢個講法，等於可以將政府無限擴張。 唔記得係 Franklin 定 Jefferson 話齋，一個大到乜都可以畀你嘅政府，亦都係大到可以奪去你嘅一切（當然，亦都係大到不能倒）。
五（二），呢頭你話政府有責任，另一邊廂其實意味著「人民亦有義務去臣服政府」；社會棟樑嘅邏輯係，呢個政府係「個別例子」，佢唔公義唔民主，我哋咪反抗囉；嗱，假如有個政府好聽人民話，官員又唔會做壞事，又唔做錯事，我哋就會聽聽話話，做個好學生，好冇？
六，好可惜，社會棟樑心目中嘅完美統治，現實係絕對唔存在嘅。又唔記得邊個講（你哋當係我講啦）：「填鴨式教育嘅存在目的，就係要好學生真心相信政府，相信權力可以改變世界，相信佢哋呢班好學生，係高人一等。」
七，當然，有啲好學生最終入唔到權力核心，佢哋就會變成 #未奪權的獨裁者 ；我一直構思緊一本小說，書名就係叫做 「未奪權的獨裁者」。
八，所以，一直以來，我好驚同呢啲「未奪權的獨裁者」打交道。當佢哋冇權，就不斷發放負能量，覺得天地萬物都唔識貨，咁嘅人材都糟蹋。佢哋一旦有權，嘩，不得了。
九，有人話，社會現象係科學，所以就出現「社會科學」；但亦有人話「人文」係藝術。當然，咩係藝術，有個定藝嘅問題。但正如我之前都不斷強調，社會現象是非對錯，其實係哲學。講社會問題唔講價值觀，就好似一個又冇魔又冇神嘅宗教，好怪。
十，社會係乜？Thatcher 甚至話：「只有個人，沒有社會！」就好似 New Age 既形而上觀點咁認為，世界只有能量，沒有物質。但係，形而下咁，都值得去討論何謂社會？何謂權力？何謂政府？
十一， 「一班人，唔理有乜關係，有關係，咪社會囉。」
十二，「呢班人係埋一齊，梗有一定嘅原因或者目的；咁佢哋為咗呢個組織、團體、社會嘅共同存在，放棄若干自由，而得出來嘅集體決定，咪係政府囉。」
十三，「任何人要達到某啲目的，如果可以唔需要其他人嘅事先認同，咪權力囉。」
十四，其實，自由同權力，有「不可協調」嘅衝突。好學生覺得，自由係負累，別人嘅自由，就更加係眼冤，所以好學生最想管晒其他人，甚至唔介意管埋自己。
十五，「不過，管人嘅，都係人，咁點算呀？」好學生去到呢個位，通常都會 hang 機；「唔好問咁多啦？冇答案嘅問題，問來做乜？」
十六，其實，一來，唔係冇答案，係佢哋接受唔到個答案。二來，冇答案嘅問題，先係最有意思嘅問題；當然，填鴨式教育呢，就，最，憎，啲，冇，既，定，答，案，嘅，問，題。
十七，講返財政預算案。今屆嘅重點，唔係派錢；如果你掛住派錢，呢個既定答案，你就中晒計。
十八，話說，政府最壞打算，係今年選舉失去立法會過半數控制權。 #駱惠寧 都打開口牌啦，係咪？ 另，最近大家都應該有留意到 #蘋果日報 嘅獨家，特首辦向北京 #打小報告，話建制派廢。
十九，建制派的確係廢，但樂觀睇，好彩佢哋咁廢。特區政府嘅精英，同建制派一直都有矛盾；國家分派嘅任務，建制派同好學生精英，點都要 #抱團。
二十，你估建制派條氣又順咩？但呢班人除咗靠中共，又有乜生存技能？所以條氣唔順，都要死撐。話說回頭，林鄭向北京小班建制，你估班建制冇向北京告狀？
廿一，換句話說，未來政府何止失去立法會過半數？建制都唔會好似以前咁乜都死撐政府。其實之前三隧分流，已經係好例子。建制派非常迷信，以為自己做民生嘢就會得到市民支持。我就更傾向相信，絕大多數投票畀建制派嘅 #藍朋友，都只係 「 #最憎啲反中亂港 」嘅 protest votes。
廿二，好，政府唔可以透過立法會去通過撥款加人手加開支，點算？
廿三，派錢，一定係政府自己做返，正所謂：「慷他人之慨，何樂而不為？」邊個反對派錢，都要承擔政治後果。
廿四，棘手嘢，就交畀啲法定機構獨立王國，甚至好似當年 #機場三跑 咁，畀佢哋自己融資。呢類 unfunded liability 只會越來越多；而且，你呢頭叫乜乜管理局做呢樣個樣，轉個頭佢就要返一啲特權：「唔係邊個搵錢去養你呀？」
廿五，仲有一點就係，土地嘅分配，係唔需要經立法會。政府會更依賴土地做籌碼；明日大嶼，亦應作如是觀。
廿六，所以，香港嘅權力核心小圈子，會更加集中響一班被委任嘅人手上。當然，呢啲乜乜物物管理局嘅人選，已經好紅，恐怕將會更紅。我亦唔排除好快呢啲獨立王國都會洗牌，以配合來緊嘅國家政策，以及行政長官選舉。
廿七，最後，以上就係政治嘅本來面目；假如你有朋友仍然信政府可以係派糖守仁愛行公義，請你千祈唔好 share 呢篇畀佢哋見到。正如 Orwell 話齋：Ignorance is bliss。 究竟，何謂 #豬？
+++++++++++++++++
【版務】
一，好多題目脫晒期 😂 ，但鐵定今個星期會推出Fortune Insight Prime 嘅收費文章專欄。
二，最後，大家如果未訂閱 Simon Says ，可以循下面連結免費登記： http://eepurl.com/gNP4Mj
原本個 email newsletter 叫 1st Draft，但 “Simon Says” 真係好正嘅 personal branding，忍唔住要用。
simon says意思 在 NCT127 Simon says 是什麼 ... - NCT Sense-NCT臺灣應援站 的推薦與評價
NCT127 Simon says 是什麼 看不懂是什麼意思就去查了一下簡單來說Simon says是一種英國的傳統遊戲就跟我們小時候玩的老師說一樣的規則遊戲中會由 ... ... <看更多>