#LoveStory #story13727
[[我們都是O1了 之 一個月了 之 女友視角]]
Re #story13339
自從我地喺中大UC草確認關係後，不經不覺已經一個月了。
呢一個月裡面，我地一齊創造左好多好難忘嘅共同回憶。
更難忘嘅係，
我隻腳多左好多蚊爛。
就好似喺UC草嗰晚，
當時詐訓中嘅我，其實好緊張。
嗰晚嘅夜風好舒服，本來我只打算闔上雙眼稍作休息，
萬萬估唔到，你溫暖嘅左手，輕輕地覆上我右手手背，
當下好似有微弱嘅電流通過全身。
你應該估唔到我當時腦海入面有幾掙扎：
[睜唔睜開眼好呢？]
[睜左講咩呀？]
[問佢做緊乜？問佢想點？So awkward!]
結果都係冇睜眼，靜靜地，喺一片黑暗中，感受著你嘅動作，
更重要嘅係,
睇下你可以做到邊一步。
其實嗰一個鐘都幾難捱。
要控制住呼吸，必須平穩而悠長，免得被你發現我詐訓；
要控制住四肢，唔可以好刻意咁郁，免得嚇親你；
最難嘅係，
有蚊爬上我隻腳係咁吸血，亦必須順隻蚊意，唔可以亂郁趕走佢。
好痕。
對腳真係好痕。
你嗰陣應該未知我其實好惹蚊。
但如果忍一時之癢可以換到你既表白，幾痕我都會忍。
雖然你嘅動作，真係有點慢。
終於等到你同我十指交纏，
而我亦終於可以睜開雙眼，舒展一下酸痛嘅身驅，
但你居然就咁拖住我，咩都唔講。
我訓喺到，望住個天，你覺得我若有所思，其實我係無語問蒼天。
[天呀，我做錯左啲咩，點解佢一啲表示都冇？]
等左你半個鐘，我終於沉不住氣，舉起我地拖住嘅手，
「你可唔可以答我，咁樣係咩意思？」
之後嘅事，大家都知道了。
我地而家一個星期大約見兩三次，而且偏愛去有草地嘅地方約會，
每一次回程嘅時候，我同佢一樣，成腳都係蚊爛。
但我唔介意。
我會記得，以後每一次同你出去，都會帶蚊怕水同無比膏，咁就冇有怕。
Hey, my boy.
我真係唔係有心裝你彈弓，只係當時情勢所逼先出此下策。
就算你為此覺得好瘀都好，我都因為你而感到非常幸福。
一直都唔敢當面同你講呢句說話，
Thank you so much, my dear.
就算只能陪你走一程，我都希望這一程有咁長得咁長。
＃inboxme #隻腳好痕 #詐訓也是一門學問 #唔係有心裝你陣弓
#一個月快樂 #其實估女校第一間就會估BPS嘅九成都係QC
From 薄扶林大學 (HKU)
===============================
開學最緊要就係識朋友！我哋幫到你！ ==> 【 http://bit.ly/dryclubgathering 】
分享你嘅小秘密 ==>【 http://bit.ly/sharesomething 】
