［香港人好富貴—你身家係咩冧把？］今日今日仲講百萬富翁實在太out．所以彭博又有新搞作 （https://bloom.bg/2odR9Az）
首先一個gag，神版友（唔tag佢，雖則佢係medium作者，仲係深烤我介紹佢用。我其實好驚佢的）成廿年前已經講：Millionaire譯百萬富翁，冇問題。但根本中文係譯唔到billionaire 呢個字。億萬富翁？但billion明明係十億（即係一千個million，一後面九個零）
事實係，百萬富翁已成為笑話。一百萬港紙？首期都未夠畀。小弟都一早係百萬富翁（搞移民台灣都要百萬五港紙啦大佬）。一百萬美金？好啲，但其實應該都唔多夠退休。有數得計，好進取當你收五厘息一年，一個月三皮嘢左右，都勉勉強強咋。冇得即時拍枱起身嘅，有乜可能係「富翁」？真係老夫子咁中頭獎都返去餵猩猩，秦先生咁中頭獎仲返去拖地咩。
百萬富翁呢個詞成為笑話，又畀你見到通脹有幾緊要，所以唔投資真係死路一條。但今日重點唔係講呢個。
彭博話，millionaire 上一級就係billionaire（以下所有都講美金，除非另有注明），實在太闊。入面已經一條歧視鏈。剛好百萬嘅，真係仲要Benz for the mouth為口奔馳，中端打工仔咋，但去到幾億（several hundred million）身家嘅，仲係millionaire，未到billionaire，但肯定已係唔使做嘅富人級。
但去到billionaire，一樣都係又分好多種，又係歧視鏈。Billionaire入門嘅，十億美金身家，當然係富豪。但只係普通富豪。Jay-Z，趙薇嗰啲明星入面嘅富豪咪十億美金身家水平（當然呢啲榜多數低估，但講故唔好駁故），係富，但唔係去到流傳千古嘅水平。你去到另一端嘅，標基呀光頭佬呀，過百Billion，千億美金身家，何止富可敵國，直頭more money than god，就唔係Jay-Z，趙薇或者NBA英超球星嗰啲級數
而在低端嘅，我地又唔會叫人做thousandnaire 或者even worse，hunderdnaire．但明明正係我地好多人嘅寫照
（埃汾按：原文咁寫咋，我肯定我啲讀者唔止咁，個撚個都一年去幾次日本，食米芝蓮，電話又成皮嘢。所以你睇美國佬幾咁窮。舊文都有講，幾千銀都拎唔到出嚟呀）（http://bit.ly/2oi4ZSk）（http://bit.ly/2mDE9DU）
正如我講，用字係好講究。我到而家都認為講「年薪二十萬」十分滑稽，正如我冇可能講我間屋「佔地四百尺」，埃汾FB Page「坐擁六千粉絲」，恒指亦冇得「勁跌300點」。用字咁極端，等同廚師勁落味精，係缺乏自信嘅表現。
彭博就話，好簡單，用scientific notation。你副身家，10 to the power幾多。就係你嘅Wealth Score
由十分忘恩嘅負2，去到湯大狀最愛嘅11（如是我聞，其實我都唔知係乜），應該包晒全人類咁滯。入門嘅百萬富翁，6分。光頭佬同標基，11分，全宇宙就係佢兩個。另一極端嘅，一蚊雞美金身家嘅小朋友，咪1分。一毫子美金身家嘅（我啲勞蘇？），咪-1。去到十分忘恩嘅-2，人類極限了。再少啲？你都唔會得閒睇文。
負資產嗰啲點算？係undefined的．10嘅幾多次方都唔會變成負數（你唔知？又證明香港地講STEM真係算鳩數）。log負數計數機只會出error．《那些年》話你知唔識log 都可以好好生活下話，可能。但負資產嘅，唯有計入忘恩嘅-2級，冇計，你突破晒人類底線。
其實，講咁多嘢，好撚似開心大發現咁。我地華文傳媒一早有講啦，身家幾多位數字嘛。嘻。根本就係運媒去紐卡素，輪子再發明。所以唔好以為鬼文一定好。不過我冇去譯（算係啦），你邊有得笑。仆街，仲要畀錢彭博先有得睇架。但你就唔使畀錢。係咪好爽先。記得畀個讚同share。未like我FB Page嘅快去，等我唔好再「坐擁六千粉絲」
不過唔止係呢類士哥嘅。彭博下面個表，有啲意思。除咗睇個士哥，負由十分忘恩嘅負2，去到湯大狀最愛嘅11外，仲有係，有幾多人，例子係乜，同埋你可以負擔到乜。大約講下
忘恩嘅負2去到你個個網友最鍾意嘅正2：少過一百蚊身家。十五億人。大鑊。基本上係一無所有，貧農。或者玩到負資產嘅人。記住，你已經幸福過十五億人。咩話？你負資產？咁只有祝你好運。我知唔啱聽，但咁嘅樓市都可以負資產，其實應該真係抵撚死的
3，一千蚊身家：十七億人。已經幾好架啦。不過香港啲小朋友一部電話都唔止。代表你唔使借錢都可以應急（有幾急？一千蚊美金做到幾多嘢）。典型嘅美國租樓者就係咁。係呀。
4，一萬蚊身家：十三億人。夠買架新車（唔係法拉利啦下），如果冇讀大學嘅美國中產家庭，就係咁上下。
5，十萬身家：得返四億人。代表你可以供樓了，嘻。典型嘅？就係美國左翼（膠？）民主黨明星（都新咗好耐）AOC，Alexandria Ocasio-Cortez。當然係佢出咗國會糧之後。之前仲係冇錢交租要做侍應的。
6，百萬身家millionaire：四千萬人。典型嘅？ Boris Johnson。代表你可以在海邊買多間屋了。又， Boris Johnson都係講緊百萬美金身家咋？你睇香港人幾咁富貴。普通一個公務員退休金都有。做食環都住千幾萬樓 （http://bit.ly/2ogR3rO）
7，千萬身家：百幾萬人咋。基本上鍾意邊度買多層樓都得（但唔係山頂掛）。典型嘅，Ginni Rometty，IBM CEO．大企業CEO頂級打公仔大約就係呢啲級數。好勁嘅可以勉強突破，例如霍建寧
8，億億聲美金：五萬個。可以在大學有楝樓係你個名。典型？Rex Tillerson。美國國務卿，已被炒。ExxonMobil蓬佩奧上手。
9，十億美金，billionaire：幾千個，夠你有間大學用自己命名。但我懷疑，得咁少？例子係意大利政棍，AC米蘭前（？）班主，萬惡嘅貝魯斯科尼 Silvio Berlusconi。或者頭先上面講嘅，Jay-Z，趙薇
10，百億美金身家：百五個，全部係富豪榜上數得出嘅名人。例如真人Iron Man，Tesla 嘅Elon Musk嗰種級數。可以買隊波（唔係西甲愛斯賓奴之類啦大佬）返嚟自己玩。但其實達拉斯小牛班主（？）Mark Cuban都講緊係9分咋下。「不過幾十億美金身家」。
11，千億美金：就係兩條友，光頭佬同標基。可以上太空呀，或者消滅天花呀咁。能人所不能，神奇頂級超卓。
12？冇了。仍需努力。
留意，企業就有four comma club（http://bit.ly/2JISKXf），講過啦，one thousand 一撇，one million 兩撇，one billion三撇，one trillion市值（美金啦）咪四撇，four comma．有幾間企業先後上過去four comma club，一萬億市值。呢刻微軟同蘋果都仲係。但人，暫時冇人接近呢個four comma club。光頭佬同標基都「只係」千億美金，要多九倍十倍先去到，似乎冇乜希望，亦冇乜必要。
睇完，都冇乜得著。不過都係睇你點睇。知足嘅，咪對下睇。香港地，人工點都皮幾兩皮嘢（洗碗都有啦），儲到一萬蚊（美金啦頂）應該唔難。當然有人飯都冇得開執紙皮，但唔係你啲網友啦。咁已經至少好過地球上45億人，一大半。但我話你知你幸福過北韓啲小朋友，唔會令你對個社會少啲不滿架，對不？因為人只會同身邊嘅人比
唔知足嘅，望上去，仲有成百萬人有千萬美金身家。你估你幾時先追到？
咁你估都估到，個分佈梗係一個金字塔啦，窮人最多，底下三層幾十億人，11分嘅得兩個。而每個士哥之間，係爭10倍。對數嘛，叫咗你唔好睇咁多《那些年》。正如早排推特有人講 7.2級同8.1級地震「等級接近」，我就唯有話佢知 振幅爭差不多10倍！強度爭30倍！十年一遇同百年一萬嘅分別。學好數學好重要的說。
最後引返原文最後一句，唔譯，原汁原味，畀你嗒下
It’s a bit appalling that disparities in wealth have gotten so big that we need logarithms to describe them. But that’s the world we live in.
記住聽日準時起身返工啦
trillion billion中文 在 英文多一點A Little More English - 英文和中文的數字系統不一樣 ... 的推薦與評價
... 中文是：個、十、百、千、萬、億（萬萬）、兆；英文是：個、十、百(hundred)、千(thousand)、百萬(million)、十億(billion)、兆(trillion)， ... ... <看更多>