《MEWE注定失敗》
一切要由一個試驗開始：
數年前，同同事開會，無無聊聊，於是開咗一個話題：
「我試下係咁講Burger King呀。嗱，我肯定自己近幾年都無喺任何地方Search過『Burger King』呢個字。我嗌啦！Burger King！Burger King！Burger King！」
過咗幾日，
Facebook彈咗個廣告畀我，係關於Burger King。
記得嗰下，
係我首次意識到，自己連講嘢都畀Facebook知道。
又或者係Google聽到，再將資料過埋畀Facebook？
唔肯定。
總之呢個Social Network已經侵佔到人類嘅血肉之中。
喺無窮數據試驗之下，
佢可以清楚你對咩有興趣、想睇咩、想聽到咩。
同時，知你唔想睇咩、唔想聽到咩，永遠唔Show畀你睇。
你嘅世界開始單一…
但大家都對單一毫不反抗，因為兩個字－「習慣」。
＝＝＝＝＝＝＝＝＝＝＝
一切要由一個習慣開始：
「Facebook係老人家先玩；後生緊係玩Instagram。」
呢一句4年前開始流行。
但無所謂，反正無論FB、IG定Wtsapp，都係屬於Facebook, Inc.
其實當日見到FB收購埋Wtsapp，我第一反應係好恐懼。
因為佢已經掌握咗我生活嘅70％。
每日IG、每日FB、每日WTSAPP，
已經成為99％香港人嘅習慣。
大習慣，唔難改變。
微小習慣，先最難改變。
尤其係關乎「另一個人」。
你拒絕了IG，
但朋友在Wtsapp Group中傳來一條IG stories Link。
如何？
而且別忘了，
Facebook是乘著千年一次的網絡革命這個「天時」而起，扎根十幾年。
它拿走了 人類「對科技最沒防範」的十年。
你肯定…自己逃得掉？
＝＝＝＝＝＝＝＝＝＝＝＝
一切要由一個賣點開始：
當年ICQ死亡、接著MSN死亡、Hkflash死亡、Xanga死亡。
它們通通輝煌過，
但死因都係一樣，有另一個具「賣點」嘅替代品出現。
當時Facebook點解受歡迎？
因為「Tag相」功能同「容易Add朋友啲朋友」。
返返15年前，你同fd去完街影完相，就要喺MSN逐張Send。
而Facebook一次過Upload，
「Tag返你」，你直接add埋其他FD。
一擊致勝。
之後慢慢有Page、開始有user generated content，都係後話。
一個平台，最重要…係「實用賣點」／「豐富內容」。
「逼自己用」係最難持之以恆。
呢一點，Twitter戰線係答案。
大家都逐漸少用，係不爭事實。（當然，而家連Twitter都加入埋「維穩」）
因為對於香港人嘅使用習慣而言，Twitter嘅獨特賣點，不吃香。
而呢個時代最恐怖係－「抄得好快」
Snapchat 受歡迎嘅功能/賣點，
到有機威脅IG時，Instagram已經抄晒。
你要用賣點去贏，都唔易。
再者，MEWE就好似10年前嘅Facebook一樣，
獨特賣點不見太多，咁而家…我哋又係「逼自己用」？
＝＝＝＝＝＝＝＝＝＝＝＝＝＝＝＝＝＝＝
最後，一切要由一個失敗開始：
呢個…係我嘅MEWE PAGE:
https://mewe.com/p/%E5%BC%B5%E6%99%A8
點解話失敗？
但我又開。
首先，唔係咁講…喺而家嘅Facebook演算法下，可能無50個人睇到…
（如果你見到有50個engagement，咁我成功咗㗎啦，蝦蝦。）
另外，原因好簡單。
覺得注定失敗就唔做，
咁呢一年大家唔使咁辛苦。
就當一次演習，
一次拒絕「科技獨大」嘅演習。
1.一切要由一個試驗開始：
你唔試第一次，就唔知下次點做得好啲。
2.一切要由一個習慣開始：
習慣，需要「天時」。
Facebook有「對科技最沒防範」的十年；
咁而家就係「對科技最有防範」的十年。
拒絕獨大，就要有新力量抗衡。
呢份動力，就係習慣。
3.一切要由一個賣點開始：
「MEWE就好似10年前嘅Facebook一樣」呢一點，或者已經足夠頂一陣…
同埋「實用賣點」我幫佢唔到；
「豐富內容」呢，可以略盡綿力…
我呢10年喺Facebook寫過嘅散文，原來都接近1000篇。
我會將自己最喜歡嘅，每日upload…等MEWE，有啲嘢睇。
＝＝＝＝＝＝＝＝＝＝＝＝＝
其實，「MEWE注定失敗」仲有另一個意思。
就係如果今次成功咗，
世界嘅人轉晒去MEWE。
咁MEWE，只會變成另一個Facebook，
佢可能會好快賣廣告，要你付費推Post，或者秒速奶共。
唔出奇。
所以，
我唔需要Facebook完全死亡，我係要佢出現大量競爭者。
對於科技，獨一永遠最危險，
當一件事變得單一，
就要有新力量抗衡，互相牽制。
今次MEWE會唔會成功，我諗睇一個月都會知道。
2020年淨返30日，
我就每日喺MEWE 最少都up一篇文。睇下結果如何。
我悲觀底，覺得成功機會不大，
但試落去，總有一次會成功，所以每次都嘗試。
最後講多次，小弟嘅MEWE PAGE:
https://mewe.com/p/%E5%BC%B5%E6%99%A8
or
https://mewe.com/p/張晨
