「嘉嘉航空」 - 北極光(4)
尋日講到我喺赫爾辛基有成10個鐘至轉機去Tromso，喺終於安頓咗件行李之後，就搭芬蘭航空嘅機場巴士出城，去到交通繁忙的鐵路站前，望著不太高灰灰的北歐天空，我深深的吸了一口空氣，嘩，一陣氣油味呢，但仍比香港的清新，也許是四周夠空曠，也許是心情影響，畢竟我才落咗機四個多小時！
先走入鐵路站看看，唔，跟其他地方的鐵路站差不多，都是舊建築外殼換上新設施內容，賣車票的那間房最光猛，而外面則盡是喝咖啡的小店，如果你沒有集郵的興趣或不特別需要寄信或明信片，就真係可以走人。呀，到咗呢個時候，如果你入門冇除衫，應該全身汗，快尐除哂尐外褸先。然後我再向下一層走，是各類形的小商店，講真，冇乜睇頭，而最大間的要算是超級市場了。要認識一個地方，逛超市最好，從價格已可知民生一二。於是二話不說就走入超市。
食物的價錢跟香港的差不多，但有一樣最吸引，就是三文魚了，生的、熟的、煙薰的、油浸的，花樣繁多，而最正是價錢，5歐羅一包，我買了一包煙薰的並立即在門外就地正法，嘩，有好多塊呀，點似香港果尐，一包得薄薄幾片， 真係透明㗎，都要百幾蚊！也理不得對手乾淨定邋遢，係咁𢲡起一塊就送入口，唔，也不知是肚餓還是心情好，真的很鮮味，食完之後真係齒頰留香！冇辦法，唔可以唔入超市掃多包傍身，哈，真幸福，有三文魚傍身！不怕變壞咩？你問。不怕，這麼冷的天氣，就算出入暖氣也不會這麼容易變的！發覺唔對路咪即刻食哂佢囉！
重出地面，要立即著番哂所有衫上身，跟住向南走，過馬路再過一條街就是Aleksanterinkatu，看起來好像很複雜，其實就是阿歷山大街，問路的話直接講中文佢地都會明，當然不能說「街」，「咳吐」這個發音你不會陌生吧，冇錯，就係阿歷山大咳吐！其實再上一條街就是名店街Pohjoiseslanadi，但係發音比較複雜，搵咗阿歷山大街定位之後，再上下前後的行會比較方便。當然你可以俾個地圖人地睇街名，但係呢個世界唔係淨係得你一個老花，你要人為咗幫你而要除咗副眼鏡就唔係幾好意思喇！
見有電車的街就是了，之後一路向海邊方向走，前行不遠的左手邊有一幢商業大廈，裡面就有一間麥記，有免費wifi，但係好弱，再上一層還有洗手間，如果由離開機場到現在仍未上過洗手間，這時候你應該有需要！
因為仍下著細細的雪和微雨，地面濕滑，雖然當地政府已不停在路面灑碎石，但仍要小心滑倒！就這樣慢慢的前行了十分鐘，巍峨莊嚴的赫爾辛基主教座堂（Helsinki Cathedral，Tuomiokirkko）就出現在你的左手面。灰濛濛的天下著小雪，襯得教堂更肅剎，美則美矣，也真是只宜留影不宜走上去，因為必經的那條樓梯上的雪已被人磨成冰，可以安全地走上去，走下來亦必有危險，已見幾個遊客滑倒，我才第一天下機，是不會亂博的，何況我改天還會再來，不過也例牌拍一個照。
當天的遊客頗多，而想買記念品的，面對教堂的就有幾間小店，可惜，貨品並不精美，但價錢卻奇貴，普通得很的一個磁石貼也要成10歐羅。要買這類記念品的話，行多幾步到海邊的小攤檔買好了，貨色一樣，價錢平兩成有多，而又更有購物樂趣，至少唔會覺得被劏得太深。
繼續向前行，經過小街就是海邊，也許是天氣不好，沿海的食肆都沒有開，而遠處的東方教會主教座堂（Uspenki Cathedral，Kanavaranta）更被雨雪掩蓋得連剪影也沒有！幸好今天只是探探路，改天再來時希望天氣會有改進。
回程時，刻意經名店街Pohjoiseslanadi，不是想shopping，而是因為那裡有一間遊客中心，資料充足，暖氣亦當然非常充足！停留了才不過二十分鐘已經成身汗！資料都攞得差唔多，亦費事除褸，於是又出去走走。
之後隨便的吃了個簡單的午餐，再行多一陣，叫做對赫爾辛基有個初步認識，便到剛才下車的對面等車回機場，好乘搭晚上八時的班機前往Tromso，正式開始我嘅極光之旅。
#何嘉麗callmeGaGa #何嘉麗 #極光之旅 #北極光 #Tromso #赫爾辛基主教座堂 #HelsinkiCathedral #UspenkiCathedral #嘉嘉航空
uspenkicathedral 在 Uspenski Cathedral | By Ataman Tours Helsinki | Facebook 的推薦與評價
18 views, 3 likes, 0 loves, 0 comments, 0 shares, Facebook Watch Videos from Ataman Tours Helsinki: Visiting Uspenski Cathedral with Iris, her family,... ... <看更多>