抗疫篇(一）
IG: @ally_blahblah
https://instagram.com/ally_blahblah?igshid=1jtemurbno3q7
荷蘭一向以開放、自由聞名，多次成為「最快樂國家」之一。荷蘭人亦以國際化、高學歷、高度包容自居。未有新冠肺炎之前，荷蘭科技發展成熟、經濟跟基優厚、政府辦事有序、國民生產力強。一波肺炎，彷彿將一切「荷蘭好」嘅優勢付諸東流。今次就同大家好快講一講過去半年，荷蘭政府如何抗疫。本文概述當地抗議時間線，評論及觀察等會之後再有更新。
喺歐洲，最先出現疫情嘅係法國、英國、德國、義大利及西班牙等地；大概一月中後期，以上各國就已經有確診個案。但荷蘭一直到二月底先有第一個確診個案。
呢條時間線大大影響荷蘭政府喺疫情初期嘅安排。事關一月份時，歐洲各國華人（包括筆者）已經大量搜購當地口罩以寄回亞洲幫助親友解決「缺罩之急」。荷蘭唔少口罩產地本來就係中國；所以當唔少荷蘭商人高價賣出口罩同時，本地根本唔夠口罩用。而有生產呼吸儀器嘅本地品牌，早就俾鄰近德國同法國一下子訂好多貨。
荷蘭抗疫時間線
初期
同其他國家唔一樣，荷蘭肺炎源頭係來自本地人。每年一、二月份，唔少荷蘭人例行到法國/義大利北部/奧地利/東歐等地滑雪。二月底，一大批剛剛滑完雪嘅荷蘭人回國，之後，就正式將「肺炎」帶回國。當中有人係護老院職員，以為只係普通感冒，帶病返工，然後就⋯⋯你懂的。
當西方國家一貫指責中國隱瞞病情等等，其實荷蘭係比鄰近地區有多接近一個月嘅時間了解情況。荷蘭衛生部早在二月初提出對醫院人手及病床不足嘅可能性。原本以為政府應該有足夠時間準備對策，點知，咩都冇。荷蘭政府不單止後知後覺，有接診個案頭幾日，一直按兵不動當二月中後期有第一確診，翌日政府依然容許全國嘉年華（carnival）舉行，各大城市都有大量年輕人參與；同時，荷蘭政府不斷表示新冠肺炎「同流感差唔多」；同時，相關官員亦表示用口罩「不切實際」。坊間亦流傳「留室內/每日探熱等屬荒謬」之談。好快，荷蘭每日就數以百計個案急升。
三月
三月份對於荷蘭嚟講係最大轉變嘅一個月。
距離第一確診已經兩個星期，三月初荷蘭一直冇採取實質行動；總理Mark Rutte只係強烈建議市民唔好握手/擁抱、保持社交距離等【註一】。直到三月中，世衛正式宣布新冠肺炎大流行，足足隔左四、五日，荷蘭先正式「做嘢」。為免重蹈義大利「封城」嘅覆轍，荷蘭政府只願意採取「智慧封城」（intellegent lockdown）嘅措施，包括關閉所有學校/餐廳/美容院/健身室等，同時容許 essential workers 返工，其他人在家工作等。最具爭議莫過於 Mark Rutte 表示希望建立「群體免疫」（herd immunity）嘅情況。有幾位國會議員提出「完全封城」（full lockdown），不過遭投票否決。後來，衛生部長Bruno Bruins 喺國會暈倒，隨後辭職。荷蘭副總理兼衛生福利及體育部長Hugo de Jonge 接任。雖然荷蘭政府後知後覺，遲遲唔願意落實抗疫措施。不過，唔少大企業，包括筆者所在公司，早以行動表示對政府政策嘅不信任，包括喺立即要所有員工在家工作直到另行通知為止。
四月到六月，荷蘭做法「離奇」有效？
喺「高峰期」，荷蘭全國一日最多新增一千多個確診個案。面對物資、檢測、IC病床等不足，唔少市民就算有新冠肺炎病徵，都得唔到檢測。同唔少歐洲國家一樣，荷蘭都想 “Flatten the curve” 以減低新冠肺炎對公共醫療系統嘅負荷。當然，社會上有唔少兩極聲音，一部份支持政府「冷靜、理性、聽取專家意見」【註二】，另一部份認為荷蘭政府抗議準備遠遠不及鄰近國家。不過，隨著「智慧封城」開始奏效，確診個案開始下跌，甚至每日個案「少於一百」。呢段期間，荷蘭累積確診個案有四、五萬確診，官方死亡人數為四、五千左右【註三】。
五月底，政府放鬆「智慧封城」措施，包括重開學校/餐廳/美容院/健身室等，不過有人數及距離限制；所有市民乘坐公共交通工具亦需要配戴口罩，違例不准乘搭/罰款等。
暑假 -- 新冠肺炎？咩嚟㗎？食得㗎？
呢個時候，數字上，相比鄰近國家如英法德意等，荷蘭「災情」的確唔算嚴重。然後，一大班荷蘭人當肺炎冇發生過，繼續到其他歐洲國家放暑假。當英、法、德等地依然規定公共場所要戴口罩，荷蘭人一出公交就會立即除口罩。一啲公司開始要員工返辦公室，金融區酒吧一到放工時間一樣人來人往。社交媒體上，隨處可見到歐洲各國出遊嘅荷蘭年輕人。同時荷蘭政府計劃與阿姆斯特丹Schipol 機場提供非強制檢驗，容許想檢驗嘅旅客/市民免費檢驗，兩日後有結果。不過，計畫維持幾星期，就被撤回。同一時間，一大班KOL喺社交媒體開始
#ikdoenietmeermee ("I no longer participate")【註四】，表示唔想在遵從搭車戴口罩及社交隔離等措施，令社會哇然。
秋季
暑假過後，荷蘭確診個案開始攀升。過去幾星期，荷蘭由每日「只有以兩百確診」，到每日幾千。過去幾日，全國每日新增七、八千確診個案（相等於香港每日新增三千）。同三至五月唔同嘅係，今次受感染，好多都係年輕力壯嘅後生一輩。民眾轉軚，批評不斷，認為政府應對不足。 荷蘭政府決定重新局部「封城」，關閉所有餐廳兩週，準備立法強制戴口罩等（係呀，仲未立法）【註五】。點知呢個時候，國王出遊到希臘度假，受到市民大眾大力批評，結果落機幾個鐘就急急腳飛返荷蘭【註六】。
短短幾個星期，荷蘭一下子變成歐洲重災區。到底呢個係邊個責任呢？
低估疫情嚴重性、各部門溝通不足、欠長遠考慮方案、沒有從錯誤學習，政府領導人短視、輕視新冠肺炎，責無旁貸。以筆者觀察，一般市民防範意識不足，「自我」觀念強，亦係疫情速速反彈重要元兇之一。荷蘭以「自由」聞名，除左係文化，亦係當地法律賦予市民強大嘅權利。一般而言，好多事情講求自律。不過，天災（人禍）面前，荷蘭政府難以強行要求市民做事。簡單一個「強行戴口罩」，原來背後嘅發律程序非常繁瑣【註七】。所以民眾自願配合非常重要。可惜，一般市民大眾對新冠肺炎認識及防範意識不足，大部分年輕人只顧自己，我行我素，“If I get it, I get it”。只要一部分人不配合，就前功盡廢。
今次講到呢度。有興趣嘅讀者亦可以睇Zondag met Lubach （Sunday with Lubach）嘅片段，批評荷蘭政府嘅「無能」：
https://www.youtube.com/watch?feature=youtu.be&v=JUx-kdbKQys&app=desktop
又：香港嘅專家真心有先見之明；醫護又好厲害，好齊心協力為香港；各位手足又非常自覺。其實香港人好優秀哦！
【註一】雖然建議大眾唔好握手及擁抱，但Mark Rutte喺記者招待會立即同公共衛生與環境研究所嘅 Jaap van Dissel 握手，成為網絡上一時「笑話」
https://www.youtube.com/watch?v=pAMsIgzXIjo&feature=emb_logo
【註二】有媒體將Mark Rutte形容為「國家守護者」，支持度由百分之四十上升至百分之七十
https://www.ad.nl/politiek/mark-rutte-is-opgestaan-als-hoeder-van-de-natie-in-crisistijd~a38f5bed/
【註三】坊間有人計算，最少有三分之一因新冠肺炎死亡嘅個案未有被納入官方數字
【註四】https://nos.nl/artikel/2349411-ikdoenietmeermee-wat-willen-de-rebellerende-bn-ers-precies.html
【註五】https://www.rijksoverheid.nl/actueel/nieuws/2020/10/13/gedeeltelijke-lockdown-om-besmettingen-terug-te-dringen?fbclid=IwAR3Kl_0rRc5ikYycv7mH20cdWA5pKx1fdQM-o16M_ccFJ7Y11wdYSe6SFVA
【註六】https://edition.cnn.com/2020/10/18/europe/dutch-king-coronavirus-vacation-intl/index.html
【註七】https://www.dutchnews.nl/news/2020/10/why-is-there-a-legal-issue-with-facemasks-and-quarantine-fines/
時間線參考 https://www.containmentnu.nl/en/articles/timeline
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲 #香港人加油 #搵工 #新冠肺炎 #武漢肺炎 #抗疫
