#宇宙船 #生物觀察日記
20210504 《算啦算命》
「hi ,我地係剛開嘅IG 商店，師傅已經幫過5000人睇過，經驗豐富，師傅想搵一d形象好的kol，互相推介、合作🙏🏻，如果你有興趣睇一生運程，師傅可免費電話通話幫你睇30分鐘，🙇🏻♀🙏不過事後幫我地出個ig story推介下，講下同師傅傾計感受，同埋睇得準的話多多推介下朋友，因為本店剛剛新開幕，想多做推廣😄大家互動下，感激萬分❤🙏🏻🙏🏻🙏🏻」以上係我啱啱收到關於一間紫微斗數IG舖頭嘅合作查詢，而我個人嘅回覆係：「但我形象認真麻麻，應該幫唔到手。」，雖然係咁，但係呢位師傅認真厲害，幫五千人睇過，每人30分鐘，即係104日不眠不休咁樣睇，假如師傅每日瞓八個鐘，都要睇156日，佢只不過係啱啱開嘅IG舖頭，有咁樣嘅成績實在相當唔錯，經驗豐富到我都唔知點解要互相合作，我計返我一日工作嘅時間都未必夠四個鐘，實在拍埋都唔夠班一齊傾合作，都唔好講真係合作，雖然佢叫我講吓同師傅傾偈嘅感受，但係我未傾已經好有感受，所以而家喺度推廣一下算數嘅文化。
呢個世界上分兩種人，一係算命，一係算數，算命嘅人會算命，算數嘅人懶得算命，30分鐘睇到一生嘅運數，咁如果我呢一生都好大喎我依家知道咗，吸引力法則底下，只要我相信，我呢一生都的確好大鑊，而其實我要知道我呢一生有幾大鑊，我呢一生到最後總會知道㗎喎，事實上我而家已經知道咗一半啦，每當我搭架死火巴士就會知啦、我跌下usb又會知啦、我每經歷一啲遭遇我又會知啦、我冇必要俾個陌生人佢問我係咪經歷過呢一啲遭遇，然後我要俾個叻佢話佢好盡吖，喂大佬，我啲遭遇，你google到㗎on9，然後成個說明嘅過程就係我聽你講吓我以前有幾不幸，讚完你之後我嘅獎勵係乜嘢啊？就係話埋俾我知將來有幾不幸？雖然都可以係幸運，但係幸運嘅人其實係唔會太去算命，你梗係瀨咗嘢你先至回去做呢啲行為啦，好人好者，去揼個骨啦好冇啊，最大問題係到底我因為啲乜嘢原因要比自己嘅時辰八字俾個陌生人啊？唔好玩啦！我細個係睇南洋十大邪術大㗎！拎唔到我條頭髮，淨係拎個時辰八字係冇用㗎 ！
雖然係咁，雖然我講到好似好睇得開，我曾經都算過命，就係阿媽病咗之後，我唔排除佢真係可能有啲用，要放啲乜嘢喺屋企嗰啲，但係呢啲真係唔坐到極點先會去做嘅行為，係超越常識同埋科學，你已經冇嘢可以處理到，你先會去尋求呢啲服務，咁我手多多去睇吓其他同佢合作過嘅KOL，我想睇吓啲人有咩煩惱先去算命呀嘛，第一個咋，我睇完第一個已經唔想再睇落去啦，睇吓呢一位客人講咩：「一路都想搵個師傅睇吓運程同埋意見、性格、個人理念都分析得好準，弱點都講中晒，師傅話我天機星性格係過分善良同冇機心，內心對錢唔夠貪唔夠重利，好學而不精，冇女性緣要避免小人，事業整體上都強偏財運，對感情方面要求唔高，連師傅都覺得好意外啊！我問過師傅點先可以貪心啲，奈何我真係太自我不肖去做⋯⋯」
雖然未見過哩一位客人啦，但係我只係想像已經感到面紅啦！我諗真係好冇煩惱先會去睇呢啲嘢啦下嘛？睇性格同理念？你哋喺自己IG已經打晒出嚟啦，慌死冇人知咁樣啦！以上嘅翻譯就係話你個人善良啦、冇機心啦、其實可以搵多啲錢啦、唔貪心啦、要提防小人啊，有邊個唔係呀？有冇人會兜口兜面話俾你知你個人好貪心呀？有冇人會話俾你知你就係個小人啊？你梗係善良啦，淨係想聽人哋讚你一兩句就已經俾個時辰八字人哋，你在明人哋在暗，少少危機意識都冇梗係冇機心啦！內心對錢真係唔夠重利呀，只係一個免費嘅服務就已經可以要求同你合作，可以話少少生意頭腦都冇呀！人哋師傅30分鐘都賺$900，你可唔可以檢討一下？我覺得我比呢啲意見真誠得多！
師傅嘅算命服務呢包埋睇外出注意啦、旺賭嘅日子啦、姻緣、家宅、疾病、兄弟，喂外出呢啲帶唔帶遮嘅問題唔好問師父啦，嘥錢；最好就唔好賭錢啦；姻緣嘅嘢你唔好偷食就唔會咁多問題㗎啦；家宅方面攞啲錢去買保險啦；疾病總會有，去做運動呀；做兄弟都要算，不如唔好做兄弟啦。總括來講，算數啦！搞咁多嘢！平時cheap advisor都俾晒意見你啦！又唔洗錢！所以呢位師傅搵我合作嘅最大問題係搶生意，行家嚟㗎大佬！
一兩幾錢算命 在 靈機文化—紫微斗數、八字算命、風水運程、星座命理專家 的推薦與評價
初三：八錢； 初四：一兩五； 初五：一兩六；初六：一兩五； 初七：八錢； 初八：一兩六； ... <看更多>