［推你要在晚餐後］又即係，肚餓唔好買Bitcoin。大量粗口（主要係在remark），不喜勿入。
TLDR：醫生係人，法官係人，投資者都係人。唔好低估生理同心理狀況對你決策嘅影響。唔好高估啲人有幾「專業」，有幾「獨立思考」。接受呢啲缺憾，然後先可以避免畀佢拖累。
＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
1. 想當年，廿年前，我都仲會睇啲「教你見工」嘅書。例如話你知HR唔會以貌取人呀，HR好專業唔會畀你啲把戲玩到呀，唔好諗住吹水過骨咁呀，難逃佢地法眼。
2. 後來我心諗，頂，啲書咪又係啲HR自己寫，唔通自己話自己唔專業？個個都話自己好專業啦，除咗有啲害群之馬。正如每一個藝人都話自己唔會腿張開靠上床上位，「不過我就聽聞有其他人咁做」「但我就絶對冇」。你上網都知，戲院傾計嘅，永遠都係其他人。每一場都有人，但一定係其他人。
3. 然後，仲有呀呃食飯之王阿Jens嘅故事（https://fbook.cc/3Snu），嘻，HR有幾專業？
4. 但講返，大個仔，有獨立思考，應該知道根本唔係咁。個個都話自己好專業，不偏不倚，唔會畀其他嘢影響自己決定。下話？幸好我地有大數據（！）。打從Freakonomics一書風行後，啲經濟學家就好鍾意做呢啲研究。「當然唔係為咗出位」「學者都係好專業的」。（而事實，呢啲研究幾好做）
5. 之前應該都有人研究過，邊個時段見工嘅人HR特別易請，考試（例如考口試考琴學車）咩時間最易拎高分。甚至我懷疑你條裙幾短 心口開幾大 本身咩上圍 都有影響（黑面神多數都係男人）。你可以拎去寫論文
6. 咁講真，如果有得揀嘅，例如人地公司肯就你時間見工嘅，真係留意下。Life Hack呀，你人生就係一連串嘅法定，分分幾個小決定就一世。唔信？你諗下剛好爭幾分讀唔到醫嘅人，剛好爭少少而入唔到大球會嘅球員。
7. 以前呢度我都寫過（https://fbook.cc/3Snv），醫生生日，病人特別易死（所以識玩記得約2月29號開刀），真係高一截的。仲有聖誕，週末都係。巧合？唔係啦，人地啲數字statistically significant。原因好多，可能心情興奮，約咗人食飯，或者走到好遠食，或者早早交畀副手做。醫生都係人，唔好咁駝鳥啦。
8. 正如舊文都提過，台灣啲友鬼月唔去開刀，驚死，根本就剛好掉轉。冇人鬼月開刀，醫生得閒，先冇咁易出錯。個個質晒之前之後開，醫生咁累，先易死人。
9. 我仲提過股災醫生會唔會開錯刀，球員生日會唔會特別易拎牌，犯規（史上得一個球員世界盃生日食紅牌，咁首先佢要夏天生日），射失十二碼等等假想。「唔去讀Econ真係嘥晒」
10. 咁另外，張相左邊，係我在Patreon寫過嘅。係丫，我係睇咗WSJ嘅文。但扯，WSJ咪又係摘錄Daniel Kahneman本書。
11. 篇文，講乳癌。醫生在臨收工前，或者放飯前，都係比較少叫病人去驗乳癌嘅。所以識揀就揀最早睇，好大機會醫生都會叫你check 下
12. Daniel Kahneman話呢啲就係Noise，同一個人，唔同時間唔同情況固然會有。亦都所以佢叫你肚餓唔好買Bitcoin唔好炒股票，心理生理因素好影響我地，唔好高估自己啲乜七自制力同獨立思考。
13. 你睇下球員射十二碼，法定時間同120分鐘後互射，入球率係爭一截的。一來身體累，二來心理壓力大。或者，你睇下Paper Trade同落場真炒，考mock同真係考試（本人分別不大），自己唱K同上台唱，你咪知有乜分別。
14. 仲有，唔同人之間，noise更加大。佢地做啲研究，即使同一個國家，同一個case畀啲法官睇量刑，判刑年期都可以爭三四年，財務顧問嘅，畀同一個客嘅資料佢，話風險承受能力好低至到好高都有，建議配置股票嘅百份比，由0-100%都有，「即係亂嚟」「明明話財務顧問好專業」「佢係專業，但唔係對你專業啫，邊個產品分佣分得多咪建議邊個畀你」
15. 右邊嗰篇，Economist，講Decision fatigue，亦係講肚餓或趕收工集中力下降。佢用個例子係批貸款重組。咁見到臨放飯或放工，批核率的確唔同。但畀你估下，臨放飯放工，會係批得鬆啲，定批得緊啲？都未必咁易估？到底肚餓時係宅心仁厚啲，定更加不近人情？
16. 答案：Decision fatigue之下，人係會啟動Default 模式！貸款重組嘅case，拉勻晒審批率係40%，所以default係唔批。亦見到趕放飯放工就會唔批嘅機會大好多
17. 法官呢？臨食飯原來易啲批假釋。醫生呢？越近放工越鍾意開抗生素（即使冇必要）。篇文冇講，但我assume 批假釋開抗生素就係default
18. 點避免呢啲情況害到你？首先個人層面，你係個用戶嘅（例如病人），除咗去game the system（做最早嘅病人）。仲可以：睇多幾個醫生，拎second opinion．
19. 仲有，文中有講，我地都係會先入為主嘅。所以有時你做決策時，可以整張Check list．例如請人，與其你畀佢天花龍鳳第一句就刷你鞋，不如整個check list喎，啱嘅先mark．唔怪得HR咁鍾意整份interview form畀 interviewer填。而埃汾就最憎，埃汾最憎填form。冇錯，我其實係個睇feel嘅人，歷任嚟見過工嘅事後都會知，我理得你講到天花龍鳳，我最關心係：我同呢條友夾唔夾到，會唔會日日想打七佢。咁當然，傾一陣未必知，所以早期我in係in好耐的。後期比較忙，就求鬼其。冇錯，decision fatigue，而我從冇話我係完美。（＊）
20. 又或者，休息下。真係十分重要。唔同嘅作家（！）有唔同嘅寫作方法，好古靈精怪都有。實不相瞞，我寫文冇靈感嗰時呢，知唔知會做乜？係去沖涼，一沖就好多靈感。
21. 仲有，你見我成日睇埋啲垃圾港產片，有啲真係唔睇都知垃圾，亦係為呢種作用，放空呀。同樣地，以前我去唱K呢，就真係完全專心唱歌，唔睇電話，亦唔講任何工作嘅嘢，亦都唔會講股票講市。
22. 最新嘅例子？而家呢篇文亦係。Andrew Wiles嘛，唔發現呢排我都好少在呢度寫股票？但事實Patreon先寫啦。Nvidia 愛馬士 日日新高 又話你知咩。仲畀你啲網友屌我唔識晶片添。係喎，我要識分啲袋先可以買愛馬士股票呀可。甘比發咗達未？（當然發咗！但佢係發咗先識分！唔好因果掉轉。即係咁講）
（＊）我耿耿於懷一件事。我在康宏時請個馬仔，咁原本都有個驚跌地我覺得OK。我老細亦都基本上信我，只係循例望左一望。點知去到HR，HR條女阻我。話條友英文唔得。我心諗，你戇鳩的嗎？我何來care佢英文得唔得？我老細都未出聲。況且，閣下咩position去話佢英文唔得？你英文好得？仲屎過我。不過當然講就天下無敵，我已經進入咗佛系mode，十幾年前可能我會嘈上去，而家嘛，「是但啦，請過個」。所以後來有位英文一樣都係媽媽地嘅小朋友執咗佢二攤，呢位小朋友都知呢個故事。呀小朋友都奇怪，做乜佢出身各樣嘢都麻麻地，成績又唔係好，我都請佢。答案，冇架，啱feel，加埋，夠平。因為我唔撚想又同HR解釋一大輪做乜鳩佢個「薪酬調查」（＊＊）話冇經験嘅應該咁多咁多人工，而我要畀多一兩千。
（＊＊）呢個真係屌開有條路，鬧多嘢。最撚好笑，佢地個乜柒「薪酬調查」。出嚟話呢個位，一年經験個人工應該20-22K（唔係實數，不重要）。話我畀23K佢多。OK，咁我當然知道呢啲都係佢地職責，或KPI，或刷存在感嘅方法。是但啦，關我春事，又唔係畀我。咁但，turn out 佢offer畀條友，係19K（留，係另一HR）。咁照計，關我春事，又唔係畀我。但我都要同個小朋友交代下嘛。我問返此HR，你老味我畀23K你又用你個「薪酬調查」大我，而家你又畀19K？即係你個「薪酬調查」把撚架啦。你估佢點答我？嘩我真係拍手呀，佢答我「我地公司有其他 benefit啦」。我屌你啦，你個「薪酬調查」其他公司肯定冇benefit架，其他公司冇大假架！冇Pantry呀！斟水要畀返錢公司呀可？當然我只係婉轉咁話佢知件事有幾好笑，而其實此人（另一個HR）冇乜嘢，都係跟規矩做嘢，所以冇必要搞到佢難做。
＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
倚鳳閣 在 捉鳳凰的好朋友~倚鳳閣~ 同樣也是府城百年老宅... | Facebook 的推薦與評價
捉鳳凰的好朋友~倚鳳閣~ 同樣也是府城百年老宅當我們發現他的時候也已是傷痕累累希望我們這些時間對老屋的陪伴改造能讓這棟老屋發光發熱大正十年重生的日式現代町屋~倚 ... ... <看更多>