平時你地派利是會派到年初七定年十五？我地就會派到年十五，新年假期太短，唯有星期六、日繼續開年飯 + 團拜活動，平時一大班人，大家都一定揀中菜，但今年我地又想特別啲，所以決定揀泰菜，於是揀咗九龍城黃珍珍泰國菜館，因為佢有3層，而且環境好好！
🥗金柚大蝦沙律：好多隻大蝦，柚子沙律好開胃，為即將落嚟嘅菜打開個大胃口。
🎃蟹肉南瓜湯：小朋友美味前菜，入面有好多蟹肉，超足料！
🍤小食拼盤：有蝦餅、魚餅、蟹餅，配埋酸辣醬食，真係好正！泰菜必食！
🍢什錦沙嗲串燒：豬、牛、雞各4，樣樣都試下，大人可以配埋沙嗲醬一齊食，小朋友就咁食都好滋味。
🐟香辣海中霸伴青芒果絲：望落好似好辣，但你就錯啦！其實唔係好辣，反而係酸酸地，少少辣味。而魚就係泰國直送紅寶石魚，真係會食唔停口，連我對仔女都食唔停口，必食！
🐔南乳燒雞：名字望落好似冇咩特別？等我話你知，燒雞好香脆，雞肉食落去又唔會好「鞋」口，真係小朋友至愛。
🥬鮑汁螺片炒通菜：正所謂一份肉三份菜，雖然今餐未必做到，但食菜是必需的，平時食開馬拉盞通菜，今次改做鮑汁，小朋友都食得。
🍍原個菠蘿炒飯；呢味一定唔少得，由細到大我去食泰菜都必定會叫，好多菠蘿，劻
霖好好笑，覺得啲肉鬆質感唔好，叫我整走佢！但我就覺得配埋肉鬆、腰果，真係好正！必食必食！
🦀M6級咖喱炒蟹配法包：你會問，點解食泰菜要食蟹？我地食嘅除咗係蟹，蟹嘅配料都好重要，就係醬料，呢個咖喱配埋M6級蟹，味道一流！記住揀法包，用嚟「點」咖喱汁食，好食到停唔到！但咖喱真係堅辣㗎！
🍹椰青水與椰汁冰：我地大部分人都揀咗椰青水，夠冰凍，又多椰青肉，芊嶠同劻霖都覺得好好味，飲唔停！我就揀咗椰汁冰，我本身好鐘意椰汁，所以椰汁冰啱哂我！
🥧甜品拼盤：泰式甜品又點少得？拼盤咩都有啲，以新鮮椰青肉及椰青水造嘅椰青糕、芒果糯米糍、仲有椰汁西米糕、芋頭西米糕、斑蘭西米糕、芝麻西米糕。
🥭椰汁芒果糯米飯：配黑、白糯米，芒果好甜好好味。
總結：泰菜其實都好啱小朋友食，大人可以食辣其實都有好多選擇，我最喜歡佢地有辣同唔辣嘅菜式選擇，好滿足嘅一餐開隻飯。
======================
黃珍珍泰國菜館
🔸總店
地址：九龍九龍城打鼓嶺道23號百營中心地庫、地下1/F
電話：2716 6269
🔹尖沙咀分店
地址：九龍尖沙咀彌敦道219號莊士倫敦廣場3樓（佐敦C1出口）
電話：2721 0099
網址：www.wongchunchun.com.hk
#開年飯 #團拜 #點少得派利是環節 #泰國菜 #小朋友都可以食到好飽 #睇你識唔識揀 #大人小朋友都好滿足 #九龍城 #黃珍珍泰國菜館 #芊嶠與劻霖成長日記
