［神奈川沖—浪裏］寫咗幾日股市甚麼，不如換下口味，講藝術。
1. 是真的。真係新一代充滿希望。美術鑑賞定乜？朋友話其實當係閱讀理解，不過有圖（即係，DBQ？）。但，幼稚園都咁多字？
2. 而頭四題都算，第五題我真係I was like……其實我都唔識答
3. 講返，埃汾雖然美術肥佬（都好似六次肥咗兩三次起碼），但呢，即係我睇波唔使識踢波啫（當然識嘅更好），我食嘢唔使識煮（都識啲嘅），咁其實埃汾年少（講緊之前十幾年）其中一個喜好，係睇畫
4. 就真係裝文青咁睇畫。梵高，林布蘭，高更（條友在大溪地搞土人搞到生花柳而死），莫奈，塞尚，雷諾亞（印象派呀）。仲有Goya，畢加索，El Greco（其實呢個係花名，即係「希臘佬」）， Velázquez，Dali。去墨西哥就睇Frida
5. 以上種種雖則有啲附庸風雅，反正自己唔畫，又唔係讀美術藝術出身。況且，講真，在鬼佬社會，呢啲就very elementary 啦華生。不過有相（亦都有女）為證，當年埃汾仲未一年去幾次日本韓國時，年年都去歐洲，而去親必睇美術館（近年就變咗去睇企鵝同食中村藤吉或者豬手，退化了），呢啲冇得扮的。
6. 講返，嘩，咩事呀，神奈川沖浪裏都出埋！
7. 不過學我朋友話齋，可能只係我小見多怪，而家啲小朋友，真係十歲已經3p（唔知咩意思，朋友講的），幼稚園已經一年去過次日本啦。又好似係喎
8. 所以唔好話呢啲咁嘅簡單嘢，分分鐘識得同你講餓媽卡些，講下懷石料理有乜元素，何謂八寸水物。
9. 或者講下飛田新地（幾乎打咗朋友個新田飛地）料理組合（聽講係食嘢的，好貴，仲好快趕你走），咩係尺八（聽講係樂器）咩係即尺咁。
10. 講返，呢個東西，「神奈川沖浪裏」，好多人都識，特別係香港人個個一年去幾次日本。不過都循例講下個斷字，係「神奈川沖—浪裏」，唔係「神奈川—沖浪裏」或者更離譜嘅「神奈川—沖浪—裏」。正如關公關羽嘅「漢壽亭侯」，係「漢壽—亭侯」，唔係「漢—壽亭侯」。不過到底「一生愛錯你的手」點斷句，學者都仲係有唔少爭論。
11. 點解會有人斷錯？因為神奈川太出名（多得男兒當入樽，同埋美軍基地）。但其實「神奈川沖」，就係神奈川外海。亦所以，唔好寫咗做「神奈川衝浪裏」（or even worse，「神奈川衝浪里」）
12. 唔想咁複雜？咁唔該配返副眼鏡，其實呢，幅畫上面係寫到明的！左上角寫到明係，「神奈川沖」「浪裏」。
13. 至於呢幅畫嘛，我知嘅唔會比你多，亦唔會比你睇維基百科多。
14. 事實上呢，都話埃汾之前睇西洋畫。去到好後期（中學？）我先知道咩係「浮世繪」
15. 而在那之前，我認識嘅浮世繪係：
A. 一隊樂隊（梁翹柏！而家成日大陸節目見到！仲有劉志遠！Beyond五人年代呀喂）。
B. 讀者文摘嘅笑話專欄（仲有 開懷篇）
C. 同埋，哈哈，打Street Fighter 時 E Honda個背景（好似係 三代目大谷鬼次の奴江戶兵衛）
16. 至於第五題，我都真係唔識答，亦唔知啲小朋友點答。點解富士山細過海浪同隻船……..well，「藝術表現手法咯」。
17. 我期望有小朋友學顧城（＊），講「你，一會看我， 一會看雲。我覺得， 你看我時很遠， 你看雲時很近。」
18. 比較好嘅答法，可能係好似以前讀中國語文及文化咁（埃汾拎A的說），兩小兒辯日，長安遠定太陽遠？梗係長安遠。抬頭只見太陽，不見長安。（同囡囡去旅行佢話邊度邊度好近，望到，我就會答佢太陽都望到）
19. 最後不如都講下，埃汾呢啲真係學霸。雖然我中一二時啲成績唔好（一班四十人我考十幾二十都試過啦下），打天才波，全部sight reading（＊＊）臨考嗰晚先睇書，但其實都真係冇乜邊科會肥佬過。
20. 甚至連體育我都冇肥過，當年嘅老師真係厚道。咁只有兩科肥過。第一就係美術，講過啦，我覺得好合理架喎。美術唔係考你寫梵高嘛，係考你畫嘛，咁你見過埃汾畫公仔就….明架啦
21. 但估下我另一科肥嘅係乜？哈哈，居然係中文作文。真係童年陰影。我都唔知咩事。可能話我離題或乜？但我地當年真係都哈哈哈算，愕一嘢之後咪又去打機。就唔會話走去問阿肥婆班主任（＊＊＊），甚至老母去質問佢或者放佢上Facebook。嘩我個仔天才橫溢你咁好打擊佢喎，你咩新鮮羅白皮去話佢唔合格？你係作家？我個寶貴仔資優呀！
22. 係喎，其實埃汾細細個（初中時）已經好鍾意寫嘢，人地週記寫食飯訓覺，我就寫社會不公義寫自己創作嘅故事。老師直頭叫我唔好寫咁多嘢。後來仲考試肥埋作文。但我想講唔係我點不屈不撓可歌可泣插神記，而係想講，有passion嘅，係真係阻唔住的（雖然呢個又好易跌入邏輯陷阱，「呢個世界上冇懷才不偶」「不遇即係你未夠有才華」）。
23. 咩畀人潑冷水嘅，邊個未試過丫。但真係命中注定你係寫嘢嘅，點潑都潑唔住的。又不過，齋有passion都係唔夠嘅，肯定埃汾再多passion都唔會變咗畫家
（＊）周潤發拍過「郁達夫傳奇」演過郁達夫（唔係畢華流嗰個）唔少人知（你唔知我話你知），但應該少啲人知，顧城生平都拍過戲，套戲叫「顧城別戀」。邊個演顧城？馮德倫！邊個做佢老婆？李綺紅！仲有架妹露點做小三，三人行。呢個組合有今生冇來世。
（＊＊）無巧不成話埃汾考琴都最叻係sight reading，因為我有期連「考試歌」都玩sight reading．係喎埃汾細個識彈琴的，好似仲幾有天份添，至少有天份過我鄰居兼小中學同學老死伍盛中，佢要練琴我就唔使。不過伍生已經而家係國際知名鋼琴家，本人就廢晒武功。證明天份係冇乜用嘅。
（＊＊＊）其實我中學啲老師普遍幾好。但呢位真係令我有啲陰影，所以事隔三十年都要寫。最記得個故事係有鑊佢整咗個唔知乜鬼深紫色嘅eye shadow返學，咁我地就梗係十分震憾背後大聲講細聲笑。其中一人（真係唔係我）畀佢放學捉咗入教員室。呀肥婆好平心靜氣咁問佢有乜咁好笑，同學梗係唔肯講。肥婆再平心靜氣咁表達唔信，堅持叫佢講，唔會追究。結果講得幾講，該同學好大聲（故意地？）在滿係其他老師嘅教員室好大聲咁講「搣時，佢地話你今日個妝成隻熊貓咁！」。然後當然有阿蛇引唔住係咁笑。呢個故事教訓大家：Truth？You can’t handle the truth
—————-—————-————
版務：嚟真的了，應該3月會有不少搞作。呢度啲文應該會繼續，但埃汾會搞收費專欄，亦都搞收費chatroom（講明先，主要係我廣播，多過回你，否則好唔得閒），甚至會搞Patreon（但未諗到有乜嘢私你地，我又唔會send露點相，當然你肯每個月幾百蚊睇我露兩點我都好歡迎），另外仲會搞個Instagram（放心，貼金融圖啫）。Stay tuned．人人冇心機work from home 時，埃汾就逆市出擊了。身體力行別人恐懼時我貪婪。其實呢度啲文都會繼續，但問心你都知，就梗係優先服侍咗有課金班忠實讀者先啦。詳情之後解
呀！仲應該會有女助手！遲下介紹佢出場！會出鏡的！但佢有啲怕醜！大家唔好嚇怕佢！
太陽盛德維基 在 天圓文化 - Facebook 的推薦與評價
聽著<幸福記號>這首歌的歌曲旋律，徜徉在音符間，享受字字句句滿溢的能量，哼唱快樂曲調，生命軌跡有幸福的記號才牢靠。 感恩天圓集團大家長- 太陽盛德導師在亂世中仍 ... ... <看更多>