日劇《Tokyo MER－流動急症室》盡地一煲式的醫療劇
TBS今季推出的醫療劇《Tokyo MER－流動急症室》，因為劇情玩得夠盡，一直收視理想，頭三集平均超過14點，不過因為奧運期間沒有暫停播映，收視大跌，撞正閉幕禮(8/8)的第六集，更只得8.4，第七集又即刻升回15點，證明了是受到觀眾喜愛的。
用「盡地一煲」去形容，因為幕後基本上將日本觀眾喜歡的元素，應有盡有地放入劇情中，有大場面、新型裝備、熱血、友情、團結、感人、新人成長、權鬥、懸疑⋯，有些情節仲踩界踩得很盡，每集都不停計算、設計煽情位，務求令觀眾唔會轉台同熄機，收視報告反映到他們的策略是成功的。
如何去到盡同踩界呢？首先，流動急症車比《Code Blue》的急救直升機更上一層樓。直升機雖然有型一些，救援範圍廣闊一些，運送時間快點，缺點卻是醫生只能帶輕便裝備，嚴重重傷患還是要送回醫院做手術，費時失事，而流動急症室有齊手術室等設備，可以更有效即時救人，功能上更勝急救直升機。另外，《Code Blue》中的醫生，會先等待災埸中的消防員，確定環境無危險，再會進入現場急救，但《Tokyo MER》的喜多見醫生(鈴木良平)，係會不理會指示，直接衝入未穩定的災場救人，除了踩界外，醫生在不安全的環境急救，亦提高了緊張感和追看性。喜多見醫生可以用熱血到癲去形容。
熱血外更安排了權鬥，兩位女政客爭做女首相，相當符合潮流，東京都知事(石田百合子)vs厚生勞動大臣(渡邊真起子)，第一集開始厚生省便設法要消滅「東京Mer」，仲派了官僚醫生音羽尚(賀來賢人）入團隊，做卧底，搞破壞，製造緊張感，不過呢，偵探劇《相棒》由第一季開始話要消滅「特命組」，玩左18季都未消滅到，純粹製作危機感手法，只要有收視，就消滅唔到。但係編劇覺得仲未夠穩陣，加入埋行動要「一個人都不能死」落去，好似Doctor X「我是不會失敗的」和古美門律師「一場官司都未輸過」一樣，又係一條吸引觀眾的常用程式，仲未完的，還有喜多見醫生的身世，同Doctor X一樣神神秘秘，這個懸疑位，應該是結尾高潮用的，在這麼大堆頭下，新人成長反而變咗次要，但一樣有，內容真係豐富到滿瀉！
目前播了七集，近尾聲了，其中只有第三集脅持人質事件，為了煽情夾硬寫衰批神槍手比較差外，其他集數都做到緊湊有氣氛，咁重成本做架急救車道具出來，預左佢有第二季了。內容玩到咁盡，其他醫療劇點算好？唔駛擔心，有種東西叫卡士，米倉涼子的《Doctor X》，唔需要這麼大陣仗收視都平均高過20點，唔知新一季能否保持這個成績了？
#日劇 #東京MER #鈴木良平
