我既第二封信。
上一封寫咗畀我上一代，呢封寫畀我下一代。
冇錯，就係Aki醬囉～
曾經有唔少人同我講過(當然我唔知佢地點解咁覺得啦)就話我一定會係個好爸爸，但偏偏，我又真係完全100%唔想生小朋友喎。
我知，我知你一定會懶正能量咁講，其實嚟自單親家庭都唔一定會影響你自己既家庭幸福架啦……
講喎。
你跳樓死唔去係你好彩啫，唔好鼓勵人跳吖唔該。
你知唔知自從上次post咗我畀我老豆果封信，幾多人私信我同我講佢嚟自單親家庭，有幾影響佢人生，或者自以為唔影響但原來最終都係重覆上一代既失敗同不幸，又或者自己同老公分開咗個仔女有幾偏激有幾憎恨呢個世界呀？
講喎。
我直情心噏到幾乎想搞個寫作班係專門幫助呢啲同我一樣嚟自單親家庭既人，自己剃光頭坐輪椅做professor X呀？
最衰我唔夠紅冇錢冇人脈咋，唔係即刻做咗啦。自己知道有幾甘，又點會想有人同自己一樣咁慘吖?
講真，成長期間我有超過1000次差啲就衝口而出問我阿媽：“點解要畀我嚟到呢個世界?”計埋仲多過我打手槍既次數，你就知有幾勁啦。
中二病既我，當時仲諗過超過100個同我生父見面對質既場面或者殺咗佢報復佢咁對我地屋企既方法，如果冇唔係好彩遇上文學同寫作，我諗我早就已經好愚蠢咁做咗好多壞事，傷害咗好多人了。
所以，仲點會想生小朋友吖，尤其係依家咁既時勢。
你話我追求夢想好勇，我話你放棄夢想生小朋友先勇呀。
尤其近呢幾年，遇到唔少人同我講，你啲遺傳基因咁好，唔生咪好嘥……?
喂，咪又葡萄住先啦，因為對我講呢番說話既，大部分都係仔嚟架，頂。
我成日覺得，有咩嘥唔嘥吖，一個天災殺埋嚟，都未計人禍或者出街畀粒電芯扑死(哇好80年代既例子呀，鋰電有冇好啲呀叔)，幾叻幾好幾善良既，要死咪又係要死，越善良越死得快，一個文化大革命摧殘幾多優良基因同血統既文化人同藝術家你唔係唔知呀？越知道得多越唔希望將個無辜純潔既小生命帶嚟呢個咁既世界架，又唔係有一兩億遺產留到畀子孫，保証佢一世離地拎住英籍護照遠離荒謬，何必太過將自己骨肉血脈睇到咁重要?
我又唔係《未來戰士》會派機械人返以前果個救世主康納個老豆，又唔係宇智波或者D之一族既後裔，有你冇你，世界咪又一樣咁運行?
最正確體現到人類總是重覆犯錯呢句話既例子，咪就係唔應該生既人，偏偏要生囉。
所以，為咗維持地球和平，為環保出一分力，我就將領養返嚟既柴犬當做自己下一代，其實已經好足夠，甚至係對我嚟講，已經跨咗一大步。
諗咁長遠做咩吖，今日唔知聽日事，響你暫時仲可以控制估算到既匆匆十幾年入面，盡心盡力對佢好，都係生命嚟既，識唔識返學講嘢又有咩所謂?除非你話打算老來佢可以養番你囉，但come on，今時今日，仲邊有呢支歌仔唱吖?
Aki嚟咗我屋企既呢一年，我人生有好大轉變，冇佢，我諗我真係仲係一個彼得潘症候群既患者，呢封信，自己最深刻一句，係佢令我grounded。因為佢，我先至好真實好活生生咁響呢個地球上面，而唔係繼續響火星獨居，遠離呢個人間世。
因為，執屎放狗，係生活最日常既日常。
Aki，雖然你唔會睇得明呢封信(睇得明先驚)但我可以向你承諾，你今後完全唔需要再有一絲擔憂會飄泊流離，再度無家可歸，只要我一息尚存，你都一定會係我家人，一定。
放心，你係除咗我阿媽之外，另一個我永遠不離不棄既女人。
我愛你。
P.S 今晚痾舊屎可唔可以拍硬檔對準少少個板板，唔好次次都碌落籠底啲罅度?
#寫這高貴情書在夜闌盡處 #我對女人都冇咁專一呀死未 #聽講好多囡囡妒忌我隻狗 #寫完呢封英文信我宣告我既進軍國際大計完結了 #封筆之作 #荷里活再見荷里活廣場都唔去了 #濃情家書 #新閱會
我對女人都冇咁專一呀死未 在 #我對女人都冇咁專一呀死未 - 探索| Facebook 的推薦與評價
explore #我對女人都冇咁專一呀死未at Facebook. ... 上一封寫咗畀我上一代，呢封寫畀我下一代。 冇錯，就係Aki醬囉～⋯⋯. 查看更多. ... <看更多>