2020年，我會稱之為「震撼年」，中美關係、武漢肺炎、香港政局、全球經濟，一環扣一環，每個「震撼彈」都令我諗，「乜原來可以咁？」
畢菲特活了89年，見證5次美股熔斷，但我實在估唔到，呢5次都係出現喺我有生之年，仲要有4次係今年10日內出現。美股熔了又斷，疫情根本未好過，但原來美股咁嘅情況下，反而可以炒到癲，今年如果你話你未喺美股度賺過錢，真係唔好話你鍾意炒股票。
美股原來可以咁樣升，而油價又原來可以跌到負，令2000萬桶原油喺海度Hea，然後原來油價爆咗，ETF竟然可以搬龍門避爆倉。最令人驚嘆係，就算油價跌到負數，香港幾間油站油價仍然共同進退：一齊企硬。
年頭滙豐門口銅獅被火燒，一把火令大家發現銅獅原來真係風水獅，邪到一個點係，銅獅一入箱，就算金融海嘯咁大濟都堅持派息嘅滙控（005），原來真係可以唔派息，派息只是傳統；而傳統係用嚟打破，邊個會估到，一場疫情，令國泰（293）幾乎要執笠，連機師都要落地送外賣。
中美磨擦，香港成風眼，外資退，中資上。港交所（388）突然成為美國上市中概股難民營，新股一隻接一隻，真係又要講一句：「要不是香港……」但原來當香港做緊中概股難民中心時，香港人都有做難民嘅一日，要其他國家通融收留。
年頭大家喊住排隊買口罩，反而刺激香港重振工業，口罩生產線遍地開花。香港人走位之快，原來真係唔可以睇少。講香港典型醒目仔，王維基是經典，港視（1137）早幾年被打壓，轉型網購仲要被睇死，最終一場疫情，令佢完全入屋。100億對35億市值，令大家發現原來港視原來真係可以拋離TVB（511）！
過去一年半，令大家真正感受原來言論自由可以唔係必然。北望神州，中國地產大亨任志強因為講錯嘢，可以突然身陷牢獄，喺中國網絡上完全消失。強大如馬雲，原來亦可以純粹唔俾面「目中無人」，螞蟻煞停兼拆骨。中國對內處處亮劍，但原來對外就搞笑。對美國都唔講了，中印邊境明明戰事不斷，但轉個頭就同印度做生意，30年來首次印度進口大米，的確面子事小，冇飯開事大。
2020年一個又一個嘅「原來」，話畀大家聽冇嘢係冇可能嘅。2020年仲有幾日，十年前國務院正式通過的「2020上海超越香港，成為國際金融中心」又有可能嗎？
官方智庫早幾日發報告：「2035年上海建成與紐約和倫敦並駕齊驅的頂級全球金融中心」。上海要超越香港大計，原來悄悄推遲了15年。
收市閒情｜2020年那些嚇死人的「震撼彈」（千頌C）
https://hk.appledaily.com/finance/20201229/6UNT6BREFVDNROEUV3Q2YF2Z6Q/
火燒雲風水 在 陳韋誠風水玄學- 風水其實係堪輿，真確解釋為擔天望地；觀察 ... 的推薦與評價
尤其是傍晚與黎明時刻，當太陽斜射，光線要穿透的雲團一般較厚，而穿透力最強的紅、橘光最能傳達至地面，所以朝霞、晚霞有時可以鮮紅似血，俗稱火燒雲」 #風水#八字# ... ... <看更多>