少少長篇配音文：
這陣子因為一個關於配音的節目，多了人討論配音這個行業，亦都多了人尊重配音員這個職業，無論節目做得好壞與否，又或者有人説節目是消費配音這個行業也好，對我來說也是一件好事，因為有人願意消費，即是代表有市場價值，而且越多人討論，就可以引起更加多人關注和了解這個行業。
入行做配音員將近二十年，每每看到一些看輕或者誤導配音這個行業，我就會有少少嬲...因為真係太多人以為配音好容易，以為有把靚聲就可以做配音員，以為配音坐喺冷氣地方睇電視，求其講幾句就有錢收好爽。真係好多人忽略咗配音員真正嘅專業價值喺邊。
呢篇文真係講得好好，大家可以睇吓！
https://www.facebook.com/1647784308807145/posts/2798633757055522/?d=n
另外這個配音節目出街之後，真係好多朋友對配音有好多疑惑同誤解，最多人問我配音係咪真係可以跑住配㗎？因為節目剪輯或者其他種種問題，真的好容易誤導觀眾。
對，作為普通觀眾，你可以話呢個係綜藝節目，觀眾睇得開心咪得囉，使乜咁認真，大家睇完笑下咪算。
但作為呢個行業嘅其中一份子，我真心覺得有啲嘢真係唔可以求其算。
所以點解我不厭其煩喺自己個平台上面打咁多字。
早幾日我出咗一個post，可能短短的文字交代得唔清楚，令到有人誤會，以為我喺度挑剔啲藝人配得唔好，以為配音係完全唔可以有身體郁動，又或者以為配音完全唔可以有任何語氣修改，咁我喺度又不厭其煩再清楚啲講吓。
1: 我根本唔係評論啲藝人配得好唔好，因為真係配音嘅時候，根本就冇咁多時間俾你準備一段幾分鐘嘅戲。單憑幾分鐘嘅戲，根本就冇得評論佢係咪一個專業嘅配音員。正如我配咗咁多年音，都唔會每套戲都配得好，咁係咪就一定代表我唔專業呢？況且配得好唔好，每個人心中都有把尺，你覺得我配得好，但亦都一定有人覺得我配得唔好，所以我唔會評論呢個節目裏面嘅藝人配得好唔好。
2: 我哋配音員都係人，唔係木頭造，少少嘅身體郁動當然可以，有時我配一啲激動嘅戲，我都會緊握拳頭，又或者有其他身體嘅小動作令我更容易投入角色。但節目裏面有啲環節，係叫個藝人要投入角色所以個身體要跟住個角色去，例如跟住角色跑住配，又或者個角色好嬲就「dum」腳去配等等。呢個概念係唔啱，因為當你要配跳樓戲，打交戲等等，
你係冇辦法可以跟住個角色去。
3: 冇錯，我哋配音有時真係會輕輕修改語氣，可能有時個客或者導配，覺得本身個演員做得唔夠，確實係會要求我哋輕輕修改，務求令到出嚟件事好睇啲。但只係有限度嘅修改。我哋嘅修改都要睇返個演員本身嘅口型，面部表情等等去修改，並唔係配音員自己本身覺得個角色做得唔好，然後用自己嘅語氣加重或者減輕，出嚟嘅效果over咗或者under咗，如果每個人都用自己嘅Standard去改，呢件事係可以變得好恐怖。
曾經試過配一套戲，個女主角跳海自殺，然後死唔去俾人救翻，但係因為嗰個演員做得太差，上咗水之後佢嘅樣同埋講對白嘅語氣，都好似啱啱食飽飯咁好有中氣，當時我就跟住個演員配。但導演同我講，啱啱跳完海應該就嚟死，把聲冇理由仲咁好中氣，但冇計啦佢現場做唔到，唯有靠你哋幫手配好佢，你幫我配到佢把聲柔弱啲唔好咁有中氣。結果我跟着導演嘅指示去配，如果你問我出嚟嘅效果一定好核突，因為用一個柔弱嘅聲根本同個樣完全唔夾。配音員唔係萬能，當然基於客人永遠是對的，佢要你配乜嘢，只要個客肯收貨就OK，但係我仍然堅信喺配音嘅角度裏面，就係唔啱。
生活中已經有好多嘢，因為唔想煩，唔想嘈，所以不斷「算啦」，「唔緊要啦」...
我唔想一個自己做咗咁多年嘅職業，都以一句算啦，來作結。
最後希望大家多啲支持粵語配音，支持香港配音員。
❤️
#理性討論
#沒有憤怒
#如果我有嘢講錯歡迎提出
#觀眾需要進步
#配音員都需要進步
#共勉之
香港配音員 在 香港配音員討論區Forum of Hong Kong Dubbing Artists 的推薦與評價
香港配音員 討論區Forum of Hong Kong Dubbing Artists 是一個延續香港配音員Fan Club的討論區，這裡可提供香港配音員的任何資訊，只要唔講粗口同唔人身攻擊就得，討論 ... ... <看更多>