#生物觀察日記
0303《小粉黃》
我睇咗套個人觀感唔好睇嘅港產片，心裡面覺得如果要支持本土，係咪應該講出真實嘅意見，咁先有得進步㗎嘛，當然唔係你講一句個世界就會進步啦，咁但係講感受就係要俾自己真正感受嘛，否則就講嚟都冇咩意思吖，又或者你講嘅目的，就唔係為咗表達感受啦。咁但係如果要支持票房，未做得出講大話嘅話就好似應該粒聲唔出，不過我見網上都有好多聰明仔，大家都冇講大話，但係係「搵啲位讚下啦」嘅狀態，反正係反抗意義嘅電影，就係我地哩個時代需要嘅電影，咁我都唔反對嘅，事實上我偏激地直頭覺得可以入場睇嘅電影，就係我哋需要嘅電影添，都餓左咁耐啦係咪。
之但係哩套電影呢，佢反抗未完結之前就完咗，亦帶唔出啲咩解決方法，咁就講一啲大家都會睇到嘅問題出嚟，但係又冇乜出路喎，所以睇嘅時候如果有眼淚流嘅話，我硬係覺得似乎唔係感動喎，係真係肉痛喎，但係大家都話好感動，我又唔明真係有乜嘢好感動，喊還喊吖，感動還感動吖，好似係兩回事喎，唔係有眼淚就代表感動喎。
即使我都好鐘意戲中嘅演員，但劇本確實有啲支離破碎，乜都講兩句最後就剩係乜都講咗兩句，每個角色都冇乜成長。咁另外最緊要啦，雖然佢支持緊一個文化，但戲中其實用咗好大篇幅去標籤哩一班文化人，好似哩班人特別容易嬲，特別容易衝動，特別容易妒忌人啦，特別容易隨街挑釁他人，而佢哋挑釁嘅行為亦有啲老套，入面用嚟diss人嘅口號亦都冇乜創意啦，比起呢兩年真係喺街頭聽到嘅反抗口號，實在係冇比較冇傷害，加上講到商業價值就好似同忘記初心畫上等號，都唔係一定啫下嘛？設定上本身比起發問呢，自己就已經俾咗好多答案，比起引發思考，比較似係自己諗完一轉之後嘅presentation，所以我睇完之後係覺得「哦，原來你係咁樣諗嘅，我唔同意。」咁就完咗件事lu。
我嘅睇戲朋友Moviematic嘅MM呢，星期一嘅時候就講咗一句「要經過烏雲密佈之後，先至可以見到彩虹。」隨即俾人質問，問係咪即係話要錯過監先至識得珍惜守法，喂唔係咁㗎下嘛？到底你聽咩㗎？可唔可以唔好將自己嘅憤怒帶去每一件事上面上綱上線，句句都講嘢有骨咁樣，因為你嘅憤怒好似係咩事都做唔到㗎喎，亂咁射，咁就同小粉紅冇分別㗎啦啵，只不過你哋係小粉黃咋嘛，stand for一樣嘢，係咪大晒呢？你嘅信念嚟嘅咋喎，好多人都有咁嘅信念㗎喎！等同信仰，你會唔會覺得自己信咗某一個神之後就自己都地位超然一啲咁吖？咁又都的確有好多人有咁樣嘅信念同想法嘅。
點都搵啲嘢鬧，又點都搵啲嘢讚，我都已經唔係好清楚而家啲人係鍾意睇啲乜嘢，定係比較鍾意去表達自己鍾意睇啲乜嘢，多個真係鍾意睇啲乜嘢。雖然我都講到咁啦，去到最後都帶返一個頭盔啦，雖然我有好多嘢唔鍾意，但係經過上兩年呢，我發現好容易發生嘅情況就係錯判形勢，可能自己真係少數，成個世界嘅人都會知道要欣賞啲乜嘢，得我自己唔夠sense睇唔明，咁但係當你表達一個意見嘅時候，其實係唔關個形勢事㗎嘛，個形勢係點，同你點樣諗，根本冇抵觸，所以都唔需要因為人哋靠邊，你就靠邊站啫，獨立思考啦下嘛。
一件作品得到誠實嘅意見係好寶貴嘅，有時如果你係創作者，心裏面都已經有啲懷疑，但係身邊嗰啲朋友又個個都喺度有讚冇彈，咁似乎唔係一件好事喎，咁可能係唔係太夠朋友喎，咁個世界就冇進步㗎啦，因為你發現都冇需要進步，都可以換到咁多掌聲。等於黃店以後就剩係捉住一堆小粉黃嘅錢就OK 㗎啦，但係唔好食嘅嘢食到底可以得到支持幾耐呢？話唔定10年後已經係小粉藍嘅世界啦喎，如果你啲嘢都係唔好食嘅話，點搞先？你諗定喎。
小粉藍嘅錢就最好搵㗎啦，佢哋個肚皮就最誠實嘅，邊度做得好食佢就去邊度㗎啦，咁但係我哋作為作品嘅創作人，係咪就係應該追求件作品好食呢？
