【搬家完成正式告別舊Blog｜長文慎入，感性幾句🚬】
有眼利讀者發現，我多返舊Blog嘅文，事關我決心要正正式式搬家，唔淨係得個新Blog 2015年後文章，既然有個自己Domain，就攞返曬2008年起舊文同相返嚟。
早前都有講過，Sina無啦啦執Blog，雖然我由2015年尾開始，已經用緊依家你見到新Blog，但一直都有用Sina做Backup，直至舊年9月無啦啦執咗，舊文都拎唔返；兩個舊Blog由2008年寫到2015年，足足有七年半文章，一下子冇曬。所以，當佢開得返Domain俾人Backup時，我即刻「做嘢」。
不過，Sina後台都幾智障，只係俾咗一堆Backup code我，真心一句hea到咁不如唔好俾，一睇都知冇咩可能就咁Plug落Wordpress，所以我要手動搬，但一開始就知道難度。
事關我本身文章有好多內置連結，全部都係連返去Sina，所以我手動搬Blog並唔係就咁Copy and paste，再加上入面有好多舊相死link我又順手執一執，估唔到「搬Blog」咁艱巨，最後，我用咗足足近兩個月時間，接近1,300篇文章，成功搬曬。
好喇，我正式可以同Sina講byebye喇。學《#無痛斷捨離》咁都要講句「多謝」，Sina，冇你，冇今日嘅我。
睇返舊Blog，感覺都幾有趣。唔敢話自己依家寫得極好，睇返12年前嘅文章，的確好稚嫩，好多都言語句法不通，都曾經年少無知，感覺寫出嚟都幾扮嘢，唔怪得當時確有發生過唔少公關災難。睇住由以前毫無standard，想寫乜就乜，到開始喺行文上有返既定嘅格式，又有過唔同層面上嘅更改，甚至自己都唔記得當年原來曾經寫過一啲咁柒咁MK說話，估唔到，可以睇到自己嘅成長過程。
Sinablog最原形，係好多年前Xanga嘅進化版，係因為我由私人Xanga寫寫吓，不如開個公開Blog－－暴露年齡系列，唔知咩係Xanga自己查吓。所以，初期我仲有少少當個日記咁寫，文章都紀錄咗好多當時無聊嘅生活花邊（之所以曾經俾人鬧過太Personal，部份內容同電影唔太關事，雖然我依家都唔明做乜要咁屌，但我理解），一邊搬Blog一邊就好似日記咁，睇返當年往事。由大學一直到出嚟社會做嘢、由曾經做到份好鍾意嘅工作，返工同時Work-life balance，到之後變成廢青得Life想Work都冇得Work，然後繼續係廢青，最後，變成廢中，依然想Work都冇得Work。學《反斗奇兵4》Forky話齋：我係垃圾。
呀原來，呢套戲曾經同一班好朋友睇，今日大家已各散東西、果套戲係同那些年我追不到的女孩睇，今日人哋婚都結埋，仲有更多戲喺已經消失嘅戲院睇，今日已變成第樣嘢－－如果大家記得，我以前係寫埋自己咩戲院睇幾點場，但之後有癡線佬聲稱戲院做，要搵CCTV起我底後，我就冇再寫，而舊Blog都經歷咗我人生最美好階段，例如去美國迪士尼實習，喺如今唔知幾時先開得返嘅AMC院線狂睇戲、去澳洲Working Holiday喺公路邊戲院度過好多個寫意Day-off、去東歐Backpack遊喺一間間特色戲院睇戲... 由呢段時間開始，養成去每個地方都要睇次戲嘅習慣。
好似由2008年開始嘅日記咁，一直睇到2015年，呢啲回憶，珍貴度不下於每一篇Blog。
以前我唔係認真咁寫，所以都有幾多錯字，加上當年寫完唔會Proof-read，甚至果陣根本唔知係錯字。如果唔係太過份變成第二個意思，我見到都保留返，當係個集體回憶。我知道，呢度好多認字特警會情緒極度不安，事但啦，反正都係舊文。
近期經歷咗一啲事，講真想用個Blog去試啲嘢，雖然依家咁嘅情況，試乜都死，但既然冇嘢做R腳指，有備無患，Build返個底先，第時正常返可以試吓。
唔知舊文對大家有冇用，好多讀者成日話想搵某某類型片、某某國家戲搵唔到，我都盡我諗到嘅，開咗一啲tag，簡單如愛情片、驚慄片、恐怖片，仲有我成日大推嘅「恥笑片」－－我相信坊間冇一個Blog或電影網站出現「恥笑片」呢個Tag，你可以由Tag連返唔同種類同地方嘅電影、唔同國家嘅遊記，當然一下子我加唔曬2015年後成個Blog，稍後會陸陸續續加返。
轉眼間，今年六月，就踏入「晞。觀影記事」第12週年。的確因為疫情，老老實實我個Blog係難咗有電影文章更新，一來唔好入咁多戲院，二來呢期就算入都真係伏片居多，對上真係超鍾意嘅，已經係《隱形客》同《瘋狂紳士幫》－－當然我諗到有其他方向Keep到寫，就係我想轉個版面原因。
喺度有樣嘢最感激嘅係，由疫情前幾乎一日一篇文，到如今一星期都未必有一篇文，Click rate依然冇乜跌過，而部份舊戲唔知點解Click rate會突然急升，莫非大家搵緊舊戲睇？估唔到係，呢期捐款同科金，都升咗好多，幾乎好似新年前咁。大家嘅「抗疫鼓勵」句子，我係收到的，可能我唔知你邊位，但你科金時每句鼓勵說話，甚至打到成篇文咁長，我全部都有睇嘅。
成日都話，下套大片已經係六月嘅《神奇女俠1984》，我當然希望《神奇女俠1984》真係如期上得到，我都希望可以同大家一齊再傾新戲，唔再係傾邊套延期、邊個明星中招、邊個明星又做柒事，甚至連舊年六月開始出現嘅政治抽水／正面屌鳩Post，都唔駛再出現。同埋，已經年幾都冇搞個分享會同聚會，希望今年內可以唔駛再擔驚受怕唔知出唔出到街、唔知會唔會食TG、唔知會唔會被扑頭，而係可以搞得返，再同大家分享電影同旅遊故事，事後再飲杯咖啡。今日唔知聽日事，12週年都冇咩想大搞、咁樣情況都唔知可以搞啲咩，或者，呢個算係今年嘅小小希望啦。
Sina server據聞四月頭會Close，喺我Double check所有文章都拎曬去新Blog後，我交叉果一刻，正式同呢個令人又愛又恨嘅朋友道別喇👋🏻
📣文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過payme課金以作支持🥳：payme.hsbc/jackyhei 或使用QR code亦可：http://bit.ly/3aKpFX8
‼最後機會‼小弟執筆之原創小說已賣剩最後一批，售完即止，請即訂購：http://bit.ly/2PKXYFA
【IG請follow】www.instagram.com/travelerwithmovie
check and balance意思 在 DBS digibank app - How to set up Peek Balance - YouTube 的推薦與評價
... <看更多>