唔見咗
我有個朋友早婚，我廿幾歲時佢已經有個四五歲嘅女，有次一齊食飯，走時發現佢個女唔見咗，一行幾個大人，喺九龍城喪搵，越搵越唔見，越唔見越驚，果刻我感受到做父母果份心情 「自責 擔憂 徬徨 內疚 無助 沮喪 失控......」犯了無可彌補的錯，永遠留下瘡疤!
後來幸好找回女兒，但果次令我決定，點都唔好自己呃自己，我係無能力負擔養育一個生命，我無能力承受生命的失去
但人生唔係話你睇通唔去受，就真係唔駛受，有啲苦兜個彎，都係要你受下，好似呢兩兄弟，跟咗八年，未會離開過門口一步，多年來多番試驗，我幾肯定佢哋係「門口貓」，但竟然尋晚去掟垃圾，門未關好，漏出幾吋罅縫，二十秒不夠兩兄弟就唔知走咗去邊，相信沿後樓梯蘯咗去，而我肯定佢哋係無能力離開大廈，我就沿樓梯上下上下喪搵，但越搵越唔見，越唔見越驚，樓下看更又話有個女人好似捧住啲嘢走，樓下隻自來貓最近又不見了，有傳是慘遭毒手，咁你話我當時有幾「自責 擔憂 徬徨 內疚 無助 沮喪 失控......」
我唔敢同貓主講，係咁繼續搵，但搵到今朝都未搵到，但我仍堅信佢哋喺大廈內
最後我用盡上網教嘅方法，爭啲要搵「流浪貓」幫手去搵，又拜神又搵動物傳心師，終於我諗起朋友個女咪好鍾意養貓，聽佢老豆講佢個女愛貓愛到，經常扮貓爬行和貓玩，又陪貓一齊食貓糧，於是絕望的我，即本又搵吓佢，諗住都係搵完聽完方法，然後覺得「都係咁」，點知朋友個女聽見我兩兄弟失蹤，佢不慌不忙冷冷地回應我「過一陣再搵下，會搵到嘅!」，我見佢咁求其，好快就收綫，然後幾分鐘後，我又絕望地去搵佢哋，點知係後樓梯一個搵過幾十次嘅位，先發現大佬，我抱住傻撚咗咁「搵到大佬!搵到大佬!」，眼淚一直在流，沒有開心因為仲有細佬，放低大佬時我話「你話我知細佬喺邊？」，大佬當然啋你都戇x，但大佬咁柒，細佬一定會睇實佢，唔會離去好遠，我再去搵，又係喺大廈一個搵過五十幾次位，終於見埋細佬，我抱住佢更乸傻「搵番晒喇!搵番晒喇!」，簡直荷里活救援電影，最尾男主角終於抱出最後一位生還者，慢鏡行向鏡頭，配以激昂嘅配樂，然後神奇彩蛋位，兩兄弟一搵番果一刻，我就收到朋友個女嘅短訊「係咪已經搵番晒!」「邊個話你知？」 「我駛乜人話我知，我叫佢哋出現俾你搵到㗎!」
當年最惶恐的半小時，就係因為佢，今日更惶恐的八小時，最後唔知係真係佢發功，但「唔見咗」呢樣嘢，做搵或被搵的，其實都不好受，所以唔好再「玩失蹤」，特別係對養育你嘅人
#我係同自己講
#徬徨500分鐘
#唔見咗最驚
#有經歷有感情
有經歷有感情 在 吳若權- 唯有經歷過感情的滄桑， 我們才學會真正的體驗： 原來 ... 的推薦與評價
唯有經歷過感情的滄桑， 我們才學會真正的體驗： 原來，世界上最溫暖、與最寒冷的， 最熟悉、與最陌生的， ... 桃花：提昇人際關係與自信、有助於幸福感及好運氣。 ... <看更多>